पारंपरिकतेपासून पेस्टलपर्यंत – आपल्या व्यक्तिमत्त्वाला साजेसा आणि ट्रेंडिंग रंग कसा निवडाल?
लगीनसराई सुरू झाली की केवळ मंगलाष्टकांचाच नाही, तर फॅशनचा देखील उत्सव सुरू होतो. विशेषतः मुलींमध्ये लग्नासाठी कोणता रंग निवडावा, कोणता ट्रेंडमध्ये आहे आणि आपल्यावर नेमका कोणता शेड खुलून दिसेल, याबाबत मोठी उत्सुकता असते. पारंपरिक रंगांना आधुनिक ट्विस्ट देत सध्या काही खास रंग फॅशनविश्वात आघाडीवर आहेत. चला जाणून घेऊया, वधूंसाठी कोणते लेहेंगा कलर्स सध्या सर्वाधिक चर्चेत आहेत.
गोल्ड – रॉयल आणि ग्लॅमरस
नेहमीच्या लाल रंगापेक्षा हटके पण तितकाच उठावदार पर्याय हवा असेल, तर गोल्ड लेहेंगा उत्तम ठरतो. खासकरून रात्रीच्या लग्नसमारंभात लाईट्समध्ये हा रंग अधिक झळाळून उठतो. शाही लूक आवडणाऱ्या वधूंसाठी हा परफेक्ट चॉइस आहे.
लाल – परंपरेचा अभिमान
लग्न म्हटलं की लाल रंग हा कायम केंद्रस्थानी असतो. धार्मिक आणि सांस्कृतिक दृष्टिकोनातून वधूसाठी लाल लेहेंगा शुभ मानला जातो. ट्रेंड बदलले तरी लाल रंगाचं महत्त्व कधीच कमी होत नाही.
मरून – राजेशाही आणि क्लासिक
गंभीर पण एलिगंट लूक हवा असेल, तर मरून लेहेंगा हा उत्तम पर्याय आहे. कॉन्ट्रास्ट दुपट्टा, नाजूक हातकाम आणि व्हेल्वेट कापड यामुळे हा रंग हिवाळी लग्नांसाठी अधिक शोभून दिसतो.
ब्राइट पिंक – बोल्ड आणि मॉडर्न
ठळक रंगांची आवड असणाऱ्यांसाठी ब्राइट पिंक लेहेंगा खास पसंतीचा ठरत आहे. केप-स्टाइल दुपट्टा आणि रंगीत जेमस्टोन दागिन्यांसोबत हा लूक अधिक स्टायलिश आणि तरुणाईने भरलेला वाटतो.
बेज – साधेपणातली भव्यता
बेज रंग साधा वाटत असेल, तर हा गैरसमज दूर करा. हा न्यूट्रल शेड विविध रंगांच्या एम्ब्रॉयडरीसाठी परफेक्ट कॅनव्हास ठरतो. गोल्ड, पिंक किंवा ग्रीन नक्षीकाम बेजवर खास उठून दिसतं.
सीफोम – पेस्टलमधला फ्रेश ट्रेंड
पेस्टल शेड्समध्ये काहीतरी वेगळं हवं असेल, तर सीफोम रंगाचा लेहेंगा सध्या वधूंचा नवा फेव्हरेट बनतोय. उन्हाळी लग्नांसाठी हलका, ताजातवाना लूक देणारा हा रंग रोझ गोल्ड एम्ब्रॉयडरीसोबत अधिक आकर्षक दिसतो.
लग्नाचा पेहराव निवडताना ट्रेंडसोबतच आपल्या त्वचेचा टोन, लग्नाचा वेळ आणि स्वतःची स्टाईल लक्षात घेणं महत्त्वाचं आहे. योग्य रंगाची निवड केल्यास तुमचा ब्रायडल लूक नक्कीच लक्षवेधी ठरेल.
