पुण्यात दिवसाच झाला अंधार; नाशिक, जळगावसह अनेक जिल्ह्यांत उभ्या पिकांचे अतोनात नुकसान, तातडीने पंचनामे करण्याची मागणी
एप्रिल महिन्याची सुरुवात झाली तरी राज्यावरील पावसाचे सावट कमी होण्याचे नाव घेत नाहीये. भारतीय हवामान विभागाने (IMD) दिलेल्या ताज्या इशाऱ्यानुसार, पुढील पाच दिवस राज्यात अवकाळी पावसाचा जोर कायम राहणार आहे. पुणे, सोलापूर, धाराशिव आणि अहिल्यानगरसह मराठवाडा व मध्य महाराष्ट्रातील अनेक जिल्ह्यांना ‘ऑरेंज’ आणि ‘येलो’ अलर्ट जारी करण्यात आला आहे. काल पुण्यात झालेल्या मुसळधार पावसामुळे दुपारीच जणू रात्र झाल्याचा भास होत होता. वादळी वाऱ्यासह झालेल्या या पावसाने शहरासह ग्रामीण भागालाही झोडपून काढले असून, काही ठिकाणी मोठ्या प्रमाणावर गारपीट झाल्याची नोंद झाली आहे.
अवकाळी पावसामुळे शेती क्षेत्राला मोठा फटका बसला आहे. शिरपूर कृषी उत्पन्न बाजार समितीमध्ये सलग तीन दिवस सुट्या असल्यामुळे शेतमाल पडून होता. मात्र, अचानक आलेल्या पावसाने हा सर्व माल भिजल्याने व्यापाऱ्यांसह शेतकऱ्यांचे लाखो रुपयांचे नुकसान झाले आहे. जळगावच्या चोपडा परिसरात झालेल्या गारपिटीने केळी आणि इतर बागायत पिकांचे कंबरडे मोडले आहे. नाशिकच्या निफाड तालुक्यातील द्राक्ष पंढरीतही काढणीला आलेल्या द्राक्ष, कांदा आणि गहू पिकांचे अतोनात नुकसान झाल्याने बळीराजाच्या डोळ्यात पाणी आले आहे.
नांदेडच्या अर्धापूर तालुक्यातील चेनापूर परिसरात वादळी वाऱ्याने अक्षरशः थैमान घातले. येथे हाता-तोंडाशी आलेले ज्वारीचे पीक पूर्णपणे भुईसपाट झाले आहे. निफाडमधील कानदळ, देवगाव आणि शिरवाडे परिसरात केवळ अर्ध्या तासाच्या पावसाने शेतीचे चित्र पालटून टाकले. शेतकरी सध्या दुहेरी संकटात सापडला असून, एकीकडे उन्हाळ्यातील उष्णता आणि दुसरीकडे पावसाचा हा अनपेक्षित मारा यामुळे ग्रामीण अर्थव्यवस्था कोलमडली आहे. नुकसानग्रस्त भागातील प्रशासनाने तातडीने बांधावर जाऊन पंचनामे करावेत आणि नुकसान भरपाई द्यावी, अशी आर्त हाक शेतकऱ्यांकडून दिली जात आहे.
या जिल्ह्यांना हवामानाचा इशारा
पुढील काही तासांत सोलापूर, धाराशिव, नाशिक, जळगाव, नंदूरबार, छत्रपती संभाजीनगर, जालना आणि बीड या भागात मेघगर्जनेसह विजांचा कडकडाट होण्याची शक्यता आहे. हवामान खात्याने नागरिकांना झाडांखाली आश्रय न घेण्याचे आणि वीज चमकताना सुरक्षित स्थळी राहण्याचे आवाहन केले आहे. एप्रिलच्या या ‘मेगा’ अवकाळीने राज्याच्या कृषी नियोजनावर मोठे प्रश्नचिन्ह उपस्थित केले आहे.
