महाराष्ट्रातील राजकीय वर्तुळात अशोक खरात यांच्याविरोधातील आरोप अधिक गंभीर होत चालले असून या प्रकरणाने नवे वळण घेतले आहे. भोंदूगिरी आणि तंत्र-मंत्रासारख्या आरोपांमुळे आधीच चर्चेत असलेल्या खरात यांच्या राजकीय हस्तक्षेपाबाबत आता नव्या चर्चा रंगू लागल्या आहेत.
मिळालेल्या माहितीनुसार, काही काळापासून अनेक वरिष्ठ नेते त्यांच्या प्रभावाखाली असल्याच्या चर्चा होत्या. मात्र, सिन्नरचे आमदार माणिकराव कोकाटे यांनी त्यांना कधीच महत्त्व दिले नाही, असे सांगितले जात आहे.
याच पार्श्वभूमीवर, खरात यांनी कोकाटे यांना मंत्रीपद देऊ नये, असा कथित फोन सुनील तटकरे यांना केल्याचा आरोप विकास लवांडे यांनी केला आहे.
दरम्यान, सिन्नर परिसरातील नागरिकांमध्येही या प्रकरणावर विविध प्रतिक्रिया उमटत आहेत. स्थानिकांच्या मते, खरात यांच्या पार्श्वभूमीमुळे अनेकांनी त्यांच्यापासून आधीपासूनच अंतर ठेवले होते. त्यामुळे कोकाटे आणि खरात यांच्यातील कोणताही फोटो किंवा व्हिडिओ समोर आलेला नाही, असेही सांगितले जात आहे.
या सर्व घडामोडींमुळे खरात यांनी खरोखरच राज्याच्या राजकारणात हस्तक्षेप केला होता का, याबाबत सखोल चौकशी करण्याची मागणी आता जोर धरत आहे.
