टॉलिवूड अभिनेता थलापती विजय (Vijay Thalapathy) पुन्हा एकदा चर्चेत आला आहे. मद्रास हायकोर्टाकडूनच अभिनेत्याला आणखी एक झटका मिळाला आहे. थलापती विजयने मद्रास उच्च न्यायालयात आयकर विभागाच्या दीड कोटींचा दंड भरण्याच्या निर्णयाला आव्हान देणारी याचिका दाखल केली. उच्च न्यायालयाने त्याची याचिका फेटाळली आहे. आयकर विभागाच्या म्हणण्यानुसार, 2015-16 या आर्थिक वर्षात विजयने 15 कोटी रुपयांचे त्याचे उत्पन्न जाहीर केले नव्हते. दंड ठोठावल्यानंतर विजयने उच्च न्यायालयात धाव घेतली होती , परंतु त्याला कोणताही दिलासा मिळाला नाही. विजयची याचिका फेटाळून लावताना, न्यायमूर्ती सेंथिलकुमार रामामूर्ती यांनी सांगितले की, दंड आकारण्याचा आदेश ठरवलेल्या वेळेत देण्यात आला होता. त्यामुळे, हस्तक्षेप करण्यास वाव देणारे काहीही नव्हते.
विजयच्या वकिलाने आदेशाला आव्हान देण्यासाठी परवानगी मागितली. न्यायाधीशांनी सांगितले की याचिकाकर्त्याला अधिकाऱ्यांसमोर आदेशाला आव्हान देण्याचा अधिकार आहे. 23 जानेवारी रोजी, दोन्ही बाजूंचे युक्तिवाद ऐकल्यानंतर न्यायधीशांनी आपला निर्णय राखून ठेवला. आता, निकाल देण्यात आला आहे. 2015 मध्ये, आयकर विभागाने अभिनेत्याच्या निवासस्थानी छापा टाकला होता. या छाप्यादरम्यान जप्त केलेल्या कागदपत्रांनुसार, अभिनेत्याने त्याच्या “पुली” चित्रपटाच्या माध्यमातून केलेल्या 15 कोटी रुपयांच्या कमाईची माहिती न दिल्याचा आरोप त्यांच्यावर ठेवण्यात आला.
