महात्मा फुले रुग्णालयाच्या पुनर्बांधणीवरून दोन्ही गटांमध्ये श्रेयवादाचा संघर्ष; ‘काम शून्य पण श्रेयाचे साम्राज्य’ बॅनरने पेटला वाद
मुंबईत लवकरच होणाऱ्या महापालिका निवडणुकीच्या पार्श्वभूमीवर उद्धव ठाकरे गट आणि मुख्यमंत्री एकनाथ शिंदे (Eknath Shinde) गटामधील संघर्ष उफाळून आला आहे. आज विक्रोळी येथे दोन्ही गटांचे कार्यकर्ते आमनेसामने आले आणि परिसरात तणावाचे वातावरण निर्माण झाले.
हा वाद महात्मा ज्योतिबा फुले रुग्णालयाच्या पुनर्बांधणीच्या श्रेयावरून पेटला. उद्धव बाळासाहेब ठाकरे गटाचे आमदार सुनील राऊत (Sunil Raut) यांनी गेल्या आठवड्यात रुग्णालयाच्या कामाची पाहणी केली होती. त्यानंतर शिंदे गटाच्या युवासेनेने सुनील राऊत यांच्यावर “काम न करता श्रेय घेण्याचा प्रयत्न” केल्याचा आरोप करत आंदोलन छेडले.
कन्नमवार नगर परिसरात झालेल्या या आंदोलनात शिंदे गटाच्या कार्यकर्त्यांनी काळे कपडे घातले होते आणि “काम शून्य पण श्रेयाचे साम्राज्य” अशा आशयाचे बॅनर लावले. त्याचबरोबर एकनाथ शिंदे यांचे ‘Dedicated to Common Man’ असे पोस्टरही हातात होते.
2014 मध्ये हे रुग्णालय बंद पडल्याने स्थानिक नागरिकांनी आंदोलन केले होते. त्यानंतर मुख्यमंत्री झाल्यानंतर एकनाथ शिंदे यांनी 500 खाटांचे नवीन रुग्णालय उभारण्याचे आदेश दिले होते. त्याचे काम सध्या सुरू असून, त्यावरूनच आता दोन्ही गटांमध्ये राजकीय श्रेयवाद पेटला आहे.
राज्यातील आगामी महापालिका निवडणुका, विशेषतः मुंबई महापालिका निवडणूक, दोन्ही पक्षांसाठी प्रतिष्ठेचा प्रश्न बनली आहे. उद्धव ठाकरे यांचा मुंबईत आपला दबदबा राखण्याचा प्रयत्न असताना, शिंदे गट मुंबई-ठाणे पट्ट्यात जास्तीत जास्त जागा जिंकून आपली ताकद दाखवण्यास कटिबद्ध आहे.
विक्रोळीतील आजचा संघर्ष ही केवळ सुरुवात असल्याचे राजकीय जाणकारांचे मत असून, महापालिका निवडणुकीच्या घोषणा झाल्यानंतर अशा संघर्षांची तीव्रता आणखी वाढण्याची शक्यता आहे.
