सिल्क, पैठणी आणि कांजीवरमची रया जाऊ नये म्हणून साठवणुकीच्या खास टिप्स; चुकूनही करू नका ‘या’ चुका.
साडी हा भारतीय महिलांच्या जिव्हाळ्याचा विषय आणि कोणत्याही कार्यक्रमाची शान असतो. सिल्क, पैठणी किंवा कांजीवरम सारख्या महागड्या साड्या आपण मोठ्या हौसेने खरेदी करतो, पण अनेकदा योग्य काळजी न घेतल्यामुळे त्यांची चमक फिकी पडते किंवा फॅब्रिक खराब होते. साडी नेसून झाल्यावर ती लगेच घडी घालून कपाटात ठेवणे ही सर्वात मोठी चूक आहे. कार्यक्रमावरून आल्यावर साडीला लागलेला घाम किंवा परफ्युमचा ओलावा सुकवण्यासाठी ती किमान २-३ तास प्लास्टिक हँगरवर मोकळी सोडावी.
साडी धुताना नेहमी थंड पाणी आणि सौम्य डिटर्जंटचा वापर करावा. कडक उन्हात साडी वाळत घातल्यास तिचा रंग उडू शकतो, त्यामुळे नेहमी सावलीतच साडी सुकवावी. जर साडीवर जिद्दी डाग असतील, तर घरगुती प्रयोगांऐवजी ‘ड्राय क्लीनिंग’चा पर्याय निवडणे केव्हाही उत्तम. इस्त्री करताना तापमान कमी ठेवावे आणि सुरक्षिततेसाठी साडीवर पातळ कागद किंवा सुती कापड ठेवून मगच इस्त्री करावी.
साड्या कधीही प्लास्टिक कव्हरमध्ये साठवू नका, कारण यामुळे ओलावा निर्माण होऊन कापड खराब होऊ शकते. त्याऐवजी सुती कापडी पिशव्या किंवा मलमलच्या कापडाचा वापर करा. साडीच्या घडीमध्ये टिश्यू पेपर ठेवल्याने सुरकुत्या पडत नाहीत. कपाटातील कीड किंवा कुबट वासापासून वाचण्यासाठी कडुलिंबाची पाने किंवा नॅप्थालीन बॉल्स वापरावेत. सर्वात महत्त्वाचे म्हणजे, दर ३-४ महिन्यांनी साडीची घडी बदलत राहा, जेणेकरून कापडाला कायमस्वरूपी घड्या पडून तेथून साडी फाटणार नाही. या छोट्या गोष्टी पाळल्यास तुमची आवडती साडी कायम नव्यासारखी दिसेल.
