जागावाटप पूर्ण, कार्यकर्ते मैदानात; संजय राऊतांचा मोठा दावा
महापालिका निवडणुका तोंडावर असताना महाराष्ट्राच्या राजकारणात मोठी घडामोड घडताना दिसत आहे. मनसे प्रमुख राज ठाकरे (Raj Thackeray) आणि शिवसेना (उद्धव बाळासाहेब ठाकरे) यांच्यातील युती जवळपास निश्चित झाल्याचे संकेत संजय राऊत (Sanjay Raut) यांनी दिले आहेत. त्यांनी स्पष्ट केले की जागावाटपाचा मुद्दा प्रत्यक्षात पूर्ण झाला असून अनेक भागांत कार्यकर्ते प्रचारालाही लागले आहेत.
राऊतांच्या म्हणण्यानुसार मुंबईसह नाशिक, पुणे, कल्याण-डोंबिवली, ठाणे आणि मीरा-भाईंदर या महत्त्वाच्या पालिकांमधील चर्चाही अंतिम टप्प्यात येऊन ठेपल्या आहेत. काही ठिकाणी विद्यमान नगरसेवकांच्या जागांमध्ये बदल करावा लागल्याने कार्यकर्त्यांच्या भावना समजून घेत मार्ग काढण्यात आला आहे. त्यामुळे कुठेही ताणतणाव किंवा रस्सीखेच नसल्याचा दावा त्यांनी केला.
युतीबाबत बोलताना संजय राऊत यांनी ठाकरेंची युती प्रत्यक्षात झाली असून केवळ अधिकृत घोषणा बाकी असल्याचे सांगितले. एबी फॉर्मचे वाटपही झाल्याचा उल्लेख त्यांनी केला. तसेच राज्य आणि देशातील निवडणूक प्रक्रियेवर टीका करत लोकशाही धोक्यात असल्याचा आरोप त्यांनी केला. “जिवंत माणसं लढत असतात, वाट पाहत बसत नाहीत,” असे म्हणत त्यांनी संघर्षाची भूमिका ठळक केली.
राज ठाकरे, उद्धव ठाकरे (Uddhav Thackeray) आणि इतर नेते सातत्याने संवादात असून जागावाटप जाहीर होताच युतीची औपचारिक घोषणा होण्याची शक्यता असल्याचेही राऊतांनी स्पष्ट केले. एकूणच, महापालिका निवडणुकांच्या पार्श्वभूमीवर ठाकरे बंधूंची जवळीक आणि महाविकास आघाडीतील हालचालींमुळे राजकीय वातावरण तापले आहे.
