इराण-इस्राईल युद्धाच्या पार्श्वभूमीवर अमेरिकेने भारताला दिलेल्या सवलतीवरून राजकारण तापले
मध्य-पूर्वेतील युद्धजन्य परिस्थितीमुळे जागतिक स्तरावर खनिज तेलाचे संकट गडद झाले असताना, अमेरिकेने भारताला रशियन तेल खरेदी करण्यासाठी ३० दिवसांची विशेष सवलत जाहीर केली आहे. इराणने होर्मुझची सामुद्रधुनी बंद केल्यामुळे भारताला होणारा तेल आणि गॅसचा पुरवठा विस्कळीत होण्याची भीती निर्माण झाली होती. या पार्श्वभूमीवर अमेरिकेचे ट्रेझरी सेक्रेटरी स्कॉट बेसेंट यांनी भारताला आपला ‘महत्त्वाचा भागीदार’ संबोधत, जागतिक बाजारपेठेतील तेलाचा प्रवाह कायम राखण्यासाठी ही तात्पुरती मुभा दिली आहे. मात्र, अमेरिकेच्या या ‘मेहेरबानी’वरून आता देशांतर्गत राजकारण तापले असून, शिवसेना (ठाकरे गट) नेते खासदार संजय राऊत यांनी केंद्र सरकार आणि पंतप्रधान नरेंद्र मोदी यांच्यावर अत्यंत बोचऱ्या शब्दांत टीका केली आहे.
संजय राऊत यांनी सरकारवर निशाणा साधताना म्हटले की, “भारत काय निर्णय घेणार हे आता अमेरिका ठरवत आहे, ही अत्यंत लाजीरवाणी बाब आहे.” रशियाकडून तेल खरेदी करण्यासाठी अमेरिकेची परवानगी लागणे, हे भारत एक ‘स्वतंत्र राष्ट्र’ नसून ‘गुलाम राष्ट्र’ असल्यासारखे वागत असल्याचे लक्षण आहे, असा आरोप त्यांनी केला. पंतप्रधान मोदी हे अमेरिकेच्या हातातील ‘कठपुतळी’ बनले असून, अमेरिकेच्या इशाऱ्यावर भारत नाचत असल्याची टीका त्यांनी केली. “जर आपल्या हक्काचे तेल खरेदी करण्यासाठी आपल्याला दुसऱ्या देशाच्या परवानगीची वाट पाहावी लागत असेल, तर अशा नेतृत्वाचा काय उपयोग?” असे म्हणत त्यांनी पंतप्रधानांच्या राजीनाम्याची मागणी केली. तसेच, या युद्धामुळे भारतीय शेतकरी, निर्यातदार आणि परदेशात अडकलेल्या हजारो नागरिकांच्या प्रश्नावर सरकारकडे कोणतीही ठोस भूमिका नसल्याचा दावा करत राऊत यांनी प्रशासकीय हतबलतेवर प्रहार केला.
