विक्रम फडणीसच्या फॅशन शोमध्ये सलमानचा स्वॅग, सोशल मीडियावर कौतुकाचा वर्षाव
मुंबई: बॉलीवूडचा दबंग स्टार सलमान खान सध्या त्याच्या चित्रपटांपेक्षा रॅम्प वॉकमुळे चर्चेत आहे. प्रसिद्ध डिझायनर विक्रम फडणीस (Vikram Fadnavis) यांच्या फॅशन शोमध्ये सलमानने शो स्टॉपर म्हणून रनवेवर धमाल उडवली. त्याच्या आत्मविश्वासपूर्ण चाल आणि स्टायलिश लूकने उपस्थित प्रेक्षकांना मंत्रमुग्ध केले. सलमानच्या रॅम्पवरील एन्ट्रीपासून प्रत्येक पावलावर टाळ्यांचा कडकडाट झाला, तर सोशल मीडियावर चाहत्यांनी त्याच्या या अंदाजावर कमेंट्सचा पाऊस पाडला.सलमानने काळ्या रंगाच्या स्टायलिश पोशाखात रॅम्पवर स्वॅग दाखवला. ‘बिग बॉस 19’ (Bigg Boss 19)चे सूत्रसंचालन करणाऱ्या या सुपरस्टारने आपल्या लूकने सर्वांना घायाळ केले. उपस्थितांमध्ये रितेश देशमुख (Ritesh Deshmukh), सुहाना खान (Suhana Khan) आणि मलायका अरोराची आई यांसारखे सेलिब्रिटीही दिसले, जे सलमानच्या जलव्यासाठी टाळ्या वाजवताना दिसले. बिपाशा बासूनेही सोशल मीडियावर सलमानच्या रॅम्प वॉकचा व्हिडिओ शेअर करत त्याचे कौतुक केले.
सोशल मीडियावर सलमानच्या या व्हिडिओवर चाहत्यांनी मजेदार आणि कौतुकात्मक प्रतिक्रिया दिल्या. एका युजरने लिहिले, “हा रॅम्प वॉक नाही, सलमानची मॉर्निंग वॉक आहे!” तर दुसऱ्याने म्हटले, “वयाच्या पन्नाशीतही सलमान तिशीतला वाटतो, त्याचा करिष्मा कायम आहे.” मलायकाची आईही व्हिडिओमध्ये टाळ्या वाजवताना दिसली, ज्याने चाहत्यांचे लक्ष वेधले.दरम्यान, सलमान सध्या त्याच्या आगामी चित्रपट ‘बॅटल ऑफ गलवान’ आणि ‘बिग बॉस 19’ च्या शूटिंगमध्ये व्यस्त आहे. नुकतेच तो लडाखला शूटिंगसाठी परतला आहे. याशिवाय, दिग्दर्शक एआर मुरुगादोस यांनी सलमानच्या ‘सिकंदर’ चित्रपटाच्या अपयशासाठी त्याच्या सेटवर उशिरा येण्याच्या सवयीला जबाबदार धरले होते. यावर सलमानने ‘बिग बॉस 19’ च्या वीकेंड का वार एपिसोडमध्ये स्पष्टीकरण दिले. तो म्हणाला, “मी रात्री 9 वाजता सेटवर यायचो, हे खरं आहे, पण त्यामागे कारण होते. शूटिंगदरम्यान माझी हाडं तुटली होती, तरीही मी माझ्या कामाशी कधीच तडजोड केली नाही.” सलमानने पुढे सांगितले की, ‘सिकंदर’ हा भावनिक चित्रपट होता आणि त्याला त्याचा अभिमान आहे.सलमान खानचा हा रॅम्प वॉक आणि त्याची प्रामाणिक प्रतिक्रिया यामुळे तो पुन्हा एकदा चाहत्यांचा लाडका ठरला आहे.
