आयसीसी ट्रॉफीपासून वर्ल्ड रेकॉर्डपर्यंत रोहितचा दबदबा; फलंदाज आणि नेता म्हणून अविस्मरणीय वर्ष
टीम इंडियाचा अनुभवी आणि स्टार फलंदाज रोहित शर्मा याच्यासाठी 2025 हे वर्ष खऱ्या अर्थाने संस्मरणीय ठरलं. या वर्षात रोहितने केवळ फलंदाज म्हणूनच नव्हे, तर कर्णधार म्हणूनही अनेक ऐतिहासिक टप्पे गाठले. नेतृत्व आणि फलंदाजी अशी दुहेरी जबाबदारी त्याने यशस्वीपणे सांभाळत भारतीय क्रिकेटमध्ये आपली वेगळी छाप उमटवली.
टी-20 वर्ल्ड कपनंतर रोहितने कसोटी क्रिकेटमधून निवृत्ती घेत सर्वांनाच आश्चर्यचकित केलं. त्यानंतर ऑस्ट्रेलिया दौऱ्यापूर्वी बीसीसीआयने त्याच्याकडील एकदिवसीय संघाचं कर्णधारपद काढून घेतलं, ज्यामुळे चाहत्यांमध्ये नाराजी दिसून आली. मात्र मैदानावर रोहितने आपल्या कामगिरीतून सर्व टीकांना प्रत्युत्तर दिलं.
रोहितच्या नेतृत्वाखाली भारताने महेंद्रसिंह धोनीनंतर दुसऱ्यांदा चॅम्पियन्स ट्रॉफी जिंकण्याचा पराक्रम केला. न्यूझीलंडविरुद्धच्या अंतिम सामन्यात रोहितने 76 धावांची महत्त्वपूर्ण खेळी करत भारताच्या विजयात मोलाचा वाटा उचलला. ही ट्रॉफी टी-20 वर्ल्ड कपनंतर रोहितच्या कर्णधारकीतील दुसरी आयसीसी विजेतेपदाची कामगिरी ठरली.
टी-20 आंतरराष्ट्रीय क्रिकेटमधून निवृत्ती घेतल्यानंतरही रोहितचा वनडेमधील फॉर्म अधिकच खुलला. त्याने एकदिवसीय क्रिकेटमध्ये 50 शतकांचा ऐतिहासिक टप्पा पार केला. सचिन तेंडुलकर आणि विराट कोहलीनंतर ही कामगिरी करणारा तो तिसरा भारतीय फलंदाज ठरला.
ऑस्ट्रेलिया दौऱ्यात रोहितने आणखी एक विक्रम आपल्या नावावर केला. एकदिवसीय क्रिकेटमध्ये ऑस्ट्रेलियाविरुद्ध सर्वाधिक सहा शतकं करणारा तो पहिला फलंदाज ठरला. या बाबतीत त्याने विराट कोहली आणि कुमार संगकारा यांना मागे टाकलं.
आंतरराष्ट्रीय क्रिकेटमध्ये रोहित ‘सिक्सर किंग’ म्हणूनही ओळखला जाऊ लागला. त्याने पाकिस्तानचा माजी खेळाडू शाहीद आफ्रिदीचा सर्वाधिक षटकारांचा विक्रम मोडीत काढत नवा जागतिक विक्रम प्रस्थापित केला.
आयपीएल 2025 मध्येही रोहितची कामगिरी लक्षवेधी ठरली. त्याने आयपीएलमध्ये 7 हजार धावा पूर्ण केल्या. विराट कोहलीनंतर हा टप्पा गाठणारा रोहित दुसरा फलंदाज ठरला. याशिवाय आयपीएलच्या इतिहासात 300 षटकार पूर्ण करण्याचा मानही त्याने मिळवला.
एकूणच 2025 हे वर्ष रोहित शर्मासाठी विक्रम, यश आणि नेतृत्वाच्या दृष्टीने सुवर्णअक्षरांनी लिहिण्यासारखं ठरलं आहे.
