रितू तावडे यांनी गुरुदेवांच्या आशीर्वादाने आपला घशाचा त्रास कमी झाल्याचे केलेले वक्तव्य वादाच्या भोवऱ्यात सापडले आहे. या विधानानंतर त्यांच्यावर मोठ्या प्रमाणात टीका झाली. विशेषतः अशोक खरात प्रकरणाच्या पार्श्वभूमीवर हे वक्तव्य आल्याने चर्चांना उधाण आले.
या टीकेला उत्तर देण्यासाठी तावडे यांनी पत्रकार परिषद घेत आपली भूमिका स्पष्ट केली. त्यांनी सांगितले की, हा विषय अंधश्रद्धेचा नसून श्रद्धेचा आहे. नम्रमुनी महाराज यांची भेट घेतल्यानंतर त्यांनी ‘ॐ’चा उच्चार करण्याचा सल्ला दिला होता, ज्यामुळे घशाला आराम मिळाल्याचा आपला अनुभव त्यांनी मांडला.
तावडे म्हणाल्या की, त्या नियमितपणे ‘ॐ’चा जप करत असून त्याचा सकारात्मक परिणाम त्यांच्या आरोग्यावर झाला. हा केवळ वैयक्तिक अनुभव होता, त्यातून अंधश्रद्धेला प्रोत्साहन देण्याचा कोणताही हेतू नव्हता.
दरम्यान, त्यांनी संजय राऊत यांच्यावरही टीका करत, त्यांच्या वक्तव्यांवर निशाणा साधला. तसेच सोशल मीडियावर होणाऱ्या ट्रोलिंगबाबत नाराजी व्यक्त करत, टीकाकारांनी मर्यादा पाळाव्यात, असेही आवाहन केले. या संपूर्ण प्रकरणामुळे श्रद्धा आणि अंधश्रद्धा यावरील चर्चा पुन्हा एकदा ऐरणीवर आली आहे.
