भाजप प्रदेशाध्यक्ष रवींद्र चव्हाण यांच्या वक्तव्यामुळे राजकीय वाद; काँग्रेसकडून माफीची मागणी, देशमुख कुटुंबाची तीव्र प्रतिक्रिया
लातूर महापालिका निवडणुकीच्या प्रचारादरम्यान भाजपचे प्रदेशाध्यक्ष रवींद्र चव्हाण यांनी केलेल्या एका वक्तव्यामुळे लातूरच्या राजकीय वर्तुळात मोठा वाद निर्माण झाला आहे. “लातूर शहरातून विलासराव देशमुख यांच्या आठवणी पुसल्या जातील,” असे विधान करताच अनेक स्तरांतून तीव्र प्रतिक्रिया उमटू लागल्या आहेत.
लातूरमध्ये भाजपच्या बूथ कार्यकर्त्यांच्या मेळाव्यात बोलताना चव्हाण यांनी कार्यकर्त्यांकडून जयघोष करून घेतल्यानंतर हे वक्तव्य केले. त्यांच्या या विधानाकडे लोकनेते विलासराव देशमुख यांचा अवमान म्हणून पाहिले जात असून, स्थानिक राजकारणी, काँग्रेस नेते तसेच सर्वसामान्य नागरिकांमध्ये नाराजी पसरली आहे.
या वक्तव्यावर आमदार अमित देशमुख यांनी तीव्र निषेध व्यक्त करत, “हे विधान लातूरच्या आणि महाराष्ट्राच्या संस्कृतीला शोभणारे नाही,” असे स्पष्ट शब्दांत सांगितले. अभिनेता रितेश देशमुख यांनीही प्रतिक्रिया देताना, “जनतेच्या मनात असलेल्या नेत्याचे नाव कुणीही पुसू शकत नाही,” असे मत व्यक्त केले.
काँग्रेस पक्षाने या प्रकरणी आक्रमक भूमिका घेत चव्हाण यांनी जाहीर माफी मागावी, अशी मागणी केली आहे. काँग्रेस खासदार डॉ. शिवाजी काळगे यांनीही, “जोपर्यंत लातूर अस्तित्वात आहे, तोपर्यंत विलासराव देशमुख यांचे नाव कायम राहील,” असे ठामपणे सांगत विधान दुर्दैवी असल्याची टीका केली.
वाद वाढल्यानंतर रवींद्र चव्हाण यांनी छत्रपती संभाजीनगर येथे स्पष्टीकरण देताना, “माझ्या वक्तव्यामुळे कुणाच्या भावना दुखावल्या असतील तर मी दिलगिरी व्यक्त करतो,” असे सांगितले. त्यांनी हे वक्तव्य विकासाच्या दृष्टीने केले होते आणि त्याचा वैयक्तिक अर्थ काढू नये, असेही स्पष्ट केले. तरीही त्यांच्या या विधानामुळे लातूरमध्ये राजकीय वातावरण तापले असून, हा वाद आगामी निवडणुकीच्या पार्श्वभूमीवर अधिक तीव्र होण्याची शक्यता आहे.
