युद्धजन्य परिस्थितीमुळे देशभरात इंधन पुरवठ्यावर ताण निर्माण झाला असून त्याचा परिणाम आता Ratnagiri जिल्ह्यातही दिसू लागला आहे. व्यावसायिक LPG गॅस सिलेंडरच्या वितरणावर प्रशासनाने निर्बंध लागू केले आहेत.
नवीन नियमांनुसार, हॉटेल व्यवसायिकांना आता फक्त एकच व्यावसायिक सिलेंडर मिळणार आहे. शहरातील सुमारे 30 मोठ्या आणि 10 लहान हॉटेलांना मर्यादित प्रमाणात गॅस पुरवठा करण्याचा निर्णय घेण्यात आला आहे. मोठ्या हॉटेलांना 19 किलोचा, तर छोट्या हॉटेलांना 5 किलोचा सिलेंडर देण्यात येणार आहे.
गॅस पुरवठ्यातील या मर्यादांमुळे अनेक हॉटेल चालक अडचणीत आले आहेत. काही ठिकाणी गॅसअभावी चुलीवर स्वयंपाक करण्याची वेळ आली आहे. विशेषतः पर्यटन हंगामात ही परिस्थिती व्यवसायासाठी मोठे आव्हान ठरत आहे.
दरम्यान, गॅस एजन्सीकडून सिलेंडर मिळणाऱ्या हॉटेलांची अधिकृत यादी जाहीर करण्यात आली आहे. या यादीबाहेरील हॉटेलांना गॅस पुरवठा केल्यास संबंधितांवर कठोर कारवाई केली जाईल, असा इशाराही प्रशासनाने दिला आहे.
