लोकप्रिय रिअॅलिटी शो बिग बॉस मराठीच्या सहाव्या सीझनमध्ये आणखी एक धक्कादायक एलिमिनेशन झाले. या आठवड्यात, गायिका प्राजक्ता शुक्रेला प्रेक्षकांकडून अपेक्षेपेक्षा कमी मते मिळाल्याने तिला घराबाहेर पडावे लागले. तिचे एलिमिनेशन तिच्या चाहत्यांसाठी मोठा धक्का होता आणि अनेकांनी सोशल मीडियावर नाराजी व्यक्त केली आहे.
बिग बॉसच्या घरात प्राजक्ताने शांत, संयमी आणि संतुलित खेळ करत प्रेक्षकांचे लक्ष वेधले होते. आपल्या स्वभावामुळे आणि गाण्यांमुळे तिने घरातील वातावरण अनेकदा प्रसन्न केले. शोदरम्यान तिची आणि सोशल मीडिया इन्फ्लुएंसर करण सोनवणे यांची मैत्रीही चर्चेचा विषय ठरली होती.
घरातून बाहेर पडताच प्राजक्ताने सोशल मीडियावर एक भावनिक पोस्ट शेअर करत आपल्या चाहत्यांचे आभार मानले. तिने लिहिले की, गायक म्हणून सुरू झालेला प्रवास आज प्रेक्षकांच्या प्रेमामुळे एका वेगळ्या टप्प्यावर पोहोचला आहे. बिग बॉसच्या घरात जाण्याचा मुख्य उद्देश प्रेक्षकांचे मनोरंजन करणे हा असतो आणि ती आजवर आपल्या गाण्यांच्या माध्यमातून ते करत आली असल्याचे तिने नमूद केले.
तिने पुढे असेही म्हटले की, घरातील गोंगाटाच्या वातावरणात तिच्या आवाजाने काही क्षणांसाठी शांतता निर्माण होत असे, ही गोष्ट तिच्यासाठी समाधानाची आहे. जरी बिग बॉसच्या घरातील तिचा प्रवास येथे संपला असला तरी पुढे वेगळ्या माध्यमातून प्रेक्षकांशी भेट होत राहील, असा विश्वास तिने व्यक्त केला.
पोस्टच्या कॅप्शनमध्येही तिने चाहत्यांचे मनापासून आभार मानत, “तुमचा प्रत्येक वोट, मेसेज आणि प्रेम माझ्यासाठी खूप महत्त्वाचे आहे. बिग बॉसचा प्रवास येथे थांबला असला तरी तुमचे पाठबळ कायम सोबत राहील,” असे लिहिले. तिच्या या पोस्टवर चाहत्यांकडून मोठ्या प्रमाणात प्रतिक्रिया आणि शुभेच्छांचा वर्षाव होत असून ती पोस्ट सध्या सोशल मीडियावर मोठ्या प्रमाणात व्हायरल होत आहे.
