अजिंक्य संघांमधील रणसंग्राम; रियान परागची ‘कॅप्टन्सी’ विरुद्ध रजत पाटीदारची ‘विजेती’ चाल, कोणाचं पारडं जड ठरणार?
आयपीएल २०२६ च्या १९ व्या मोसमात आज क्रिकेट चाहत्यांना एका हाय-व्होल्टेज सामन्याची मेजवानी मिळणार आहे. सलग तीन विजय मिळवून गुणतालिकेत अव्वल स्थानी असलेला राजस्थान रॉयल्स आणि गतविजेता रॉयल चॅलेंजर्स बंगळुरू आज आमनेसामने येणार आहेत. विशेष म्हणजे, दोन्ही संघ या मोसमात अद्याप अपराजित असून शुक्रवारी १० एप्रिल रोजी होणाऱ्या या सामन्यात एका संघाची विजयी घोडदौड थांबणार हे निश्चित आहे. राजस्थानने रियान परागच्या नेतृत्वाखाली चेन्नई, गुजरात आणि मुंबई सारख्या बलाढ्य संघांना धूळ चारत विजयाची हॅट्ट्रिक साधली आहे, तर दुसरीकडे आरसीबीने रजत पाटीदारच्या मार्गदर्शनाखाली सलग दोन सामने जिंकून आपले इरादे स्पष्ट केले आहेत.
सध्या राजस्थान रॉयल्स ६ गुणांसह पहिल्या क्रमांकावर असली, तरी नेट रनरेटच्या बाबतीत आरसीबीने बाजी मारली आहे. राजस्थानचा रनरेट +२.४०३ आहे, तर आरसीबीचा रनरेट त्याहूनही सरस म्हणजे +२.५०१ इतका आहे. मात्र, राजस्थानचा आत्मविश्वास सध्या गगनाला भिडला आहे, कारण त्यांनी आतापर्यंतच्या प्रवासात तीन माजी विजेत्या संघांना पराभूत केले आहे.
२०२५ च्या हंगामात आरसीबीने राजस्थानवर पूर्णपणे वर्चस्व गाजवले होते. गेल्या वर्षी झालेल्या दोन्ही लढतीत आरसीबीने राजस्थानला ९ विकेट्स आणि ११ धावांनी पराभूत केले होते. त्यामुळे आजच्या सामन्यात राजस्थान त्या जुन्या पराभवाचा बदला घेणार की आरसीबी आपले वर्चस्व कायम राखणार, याकडे सर्वांचे लक्ष लागले आहे.
आरसीबीचा आधारस्तंभ विराट कोहली सध्या भलत्याच फॉर्ममध्ये आहे. पहिल्या दोन सामन्यांत त्याने एका अर्धशतकासह ९७ धावा फटकावल्या आहेत. राजस्थानच्या गोलंदाजांसमोर विराटला रोखण्याचे मोठे आव्हान असेल. राजस्थानसाठी त्यांची सलामी जोडी यशस्वी जैस्वाल आणि युवा वैभव सूर्यवंशी सध्या डोकेदुखी ठरत आहेत. मुंबईविरुद्धच्या पावसाने व्यत्यय आणलेल्या सामन्यात त्यांनी अवघ्या ११ षटकांत ८० धावांची भागीदारी केली होती. या ‘पॉवरफुल’ जोडीला लवकर बाद करण्यासाठी आरसीबीला विशेष रणनीती आखावी लागणार आहे.
एका बाजूला राजस्थानची विजयाची लय आहे, तर दुसऱ्या बाजूला आरसीबीचा जबरदस्त रनरेट आणि गेल्या वर्षीचा रेकॉर्ड. आजचा सामना केवळ दोन गुणांसाठी नसून वर्चस्व सिद्ध करण्यासाठी असेल!
