पत्नीच्या निधनानंतर खचलेल्या बॉब क्रिस्टो यांनी ७०-८० च्या दशकात गाजवले रुपेरी पडदा
२० मार्च १९३८ रोजी ऑस्ट्रेलियात जन्मलेले रॉबर्ट जॉन क्रिस्टो ऊर्फ बॉब क्रिस्टो हे व्यवसायाने सिव्हिल इंजिनिअर होते. त्यांचे आयुष्य जर्मनीमध्ये सुखात चालले होते, मात्र पत्नीच्या अपघाती निधनाने त्यांना मोठा धक्का बसला. याच काळात त्यांच्या नजरेस अभिनेत्री परवीन बाबी यांचा एका मासिकावरील फोटो पडला आणि ते इतके प्रभावित झाले की, सर्व काही सोडून थेट मुंबईत दाखल झाले. परवीन बाबींच्या भेटीनंतर त्यांच्या नशिबाने कलाटणी घेतली आणि १९८० मध्ये ‘अब्दुल्ला’ चित्रपटातून त्यांचा बॉलीवूड प्रवास सुरू झाला.
आपली भारदस्त शरीरयष्टी आणि परदेशी लूकमुळे बॉब क्रिस्टो अल्पावधीतच लोकप्रिय झाले. त्यांनी अमिताभ बच्चन यांच्यापासून ते संजय खानपर्यंत अनेक दिग्गजांसोबत काम केले. सुमारे २०० पेक्षा जास्त चित्रपटांमध्ये त्यांनी खलनायकाची भूमिका साकारून प्रेक्षकांच्या मनात धडकी भरवली. अभिनयाचा हा प्रवास थांबल्यानंतर त्यांनी आपला मोर्चा योगाकडे वळवला आणि बेंगळुरूमध्ये योग प्रशिक्षक म्हणून साधे जीवन व्यतीत केले. एका परदेशी माणसाचा भारतीय चित्रपटसृष्टीतील हा प्रवास आजही अनेक चाहत्यांसाठी कुतूहलाचा विषय आहे.
