बेपत्ता तरुणाचा मृतदेह सापडल्यानंतर पोलिसांची तपासाची चक्रे वेगात; पत्नीसह सात जणांना अटक.
नाशिक जिल्ह्यातील निफाड तालुक्यातील उगाव येथे घडलेल्या एका धक्कादायक घटनेने परिसरात खळबळ उडाली आहे. पतीच्या हत्येच्या कटात स्वतः पत्नीच सहभागी असल्याचे पोलिस तपासात उघड झाले आहे. या प्रकरणी पत्नीने तिच्या प्रियकर आणि भावाच्या मदतीने पतीची हत्या केल्याचा आरोप असून पोलिसांनी एकूण सात जणांना अटक केली आहे.
माहितीनुसार, उगाव येथील शादाब रज्जाक तांबोळी हा तरुण काही दिवसांपूर्वी बेपत्ता झाला होता. नंतर चांदवड तालुक्यातील परसुल परिसरात त्याचा मृतदेह आढळून आल्याने खळबळ उडाली. या प्रकरणाचा तपास करताना पोलिसांनी घटनास्थळावरील पुरावे तसेच तांत्रिक माहितीच्या आधारे तपास सुरू केला. तपासादरम्यान पत्नीनेच प्रियकर व तिच्या भावाच्या मदतीने पतीचा खून केल्याचे समोर आले.
पोलिसांनी या प्रकरणी पत्नीसह सात संशयितांना ताब्यात घेतले असून हत्येमागील नेमके कारण काय होते याचा सखोल तपास सुरू आहे.
