नवी मुंबई विमानतळ, मेट्रो लाईन-३ चे उद्घाटन करणार
नवी दिल्ली : पंतप्रधान नरेंद्र मोदी (Narendra Modi) उद्या (बुधवार) पासून महाराष्ट्राच्या दोन दिवसांच्या दौऱ्यावर येणार आहेत, त्या दरम्यान ते मुंबई महानगर प्रदेशात शहरी संपर्क आणि वाहतूक कार्यक्षमता वाढवण्याच्या उद्देशाने अनेक प्रमुख पायाभूत सुविधा प्रकल्पांचे उद्घाटन करतील. पंतप्रधान नवी मुंबई आंतरराष्ट्रीय विमानतळ (NMIA) च्या पहिल्या टप्प्याचे उद्घाटन करतील.
३० सप्टेंबर रोजी नागरी विमान वाहतूक महासंचालनालयाकडून (DGCA) एअरोड्रोम परवाना मिळालेल्या या विमानतळाचा विकास नवी मुंबई आंतरराष्ट्रीय विमानतळ लिमिटेड (NMIAL) द्वारे टप्प्याटप्प्याने केला जात आहे. हा एक महत्त्वाचा ग्रीनफील्ड एव्हिएशन प्रकल्प आहे. १९,६५० कोटी रुपये खर्चून विकसित केलेल्या या प्रकल्पात अदानी समूहाचा ७४ टक्के हिस्सा आहे आणि उर्वरित २६ टक्के हिस्सा सिडकोचा आहे. विद्यमान छत्रपती शिवाजी महाराज आंतरराष्ट्रीय विमानतळावरील भार कमी करण्यासाठी डिझाइन केलेले, एनएमआयए या प्रदेशातील दुसरे प्रमुख विमान वाहतूक केंद्र म्हणून याकडे पहिले जाते. त्याला आयएटीए कोड ‘एनएमआय’ देण्यात आला आहे.
१,१६० हेक्टरमध्ये पसरलेले, एनएमआयए दरवर्षी ९० दशलक्ष प्रवाशांना आणि ३.२५ दशलक्ष मेट्रिक टन कार्गो हाताळण्यासाठी डिझाइन केलेले आहे. सर्व टर्मिनल्सना जोडण्यासाठी ऑटोमेटेड पीपल मूव्हर (एपीएम), ४७ मेगावॅटची सौर ऊर्जा निर्मिती, शाश्वत विमान इंधन (एसएएफ) साठी समर्पित पायाभूत सुविधा, ईव्ही बस कनेक्टिव्हिटी आणि वॉटर टॅक्सी सेवांद्वारे जोडलेले भारतातील पहिले विमानतळ असेल, असे निवेदनात म्हटले आहे.
नंतर पंतप्रधान आचार्य अत्रे चौक ते कफ परेड मुंबई मेट्रो लाईन-३ च्या फेज २बी चे उद्घाटन करण्यासाठी मुंबईला जातील. ते संपूर्ण ३३.५ किमी भूमिगत मेट्रो लाईन-३ (अॅक्वा लाईन) राष्ट्राला समर्पित करतील. हा कॉरिडॉर एकूण ३७,२७० कोटी रुपये खर्चून बांधण्यात आला आहे. २७ स्थानकांसह, लाईन-३ आरे ते कफ परेडला जोडेल आणि दररोज १३ लाख प्रवाशांना सेवा देईल, अशी अपेक्षा आहे. ही लाईन मुंबई उच्च न्यायालय, मंत्रालय, आरबीआय, बीएसई आणि इतर व्यावसायिक केंद्रांसारख्या महत्त्वाच्या ठिकाणी थेट प्रवेश प्रदान करेल, तसेच गर्दी कमी करण्यासाठी आणि शेवटच्या मैलापर्यंतची कनेक्टिव्हिटी सुधारण्यासाठी विद्यमान रेल्वे, मेट्रो आणि मोनोरेल सेवांशी एकात्मता साधेल.
पंतप्रधान ‘मुंबई वन’ हे भारतातील पहिले इंटिग्रेटेड कॉमन मोबिलिटी अॅप देखील लाँच करतील, जे मेट्रो, मोनोरेल, उपनगरीय रेल्वे आणि महानगरपालिका वाहतूक सेवांमधील ११ सार्वजनिक वाहतूक ऑपरेटरना एकत्र आणते. हे अॅप तिकीट, मार्ग नियोजन, रिअल-टाइम प्रवास अद्यतने आणि सुरक्षा सूचनांसाठी एकच डिजिटल इंटरफेस प्रदान करते, ज्याचा उद्देश मुंबई महानगर प्रदेशातील प्रवाशांचा अनुभव सुलभ करणे आहे.
याव्यतिरिक्त, मोदी महाराष्ट्र सरकारचा एक नवीन कौशल्य विकास उपक्रम, शॉर्ट-टर्म एम्प्लॉयबिलिटी प्रोग्राम (STEP) लाँच करतील. ४०० सरकारी आयटीआय आणि १५० तांत्रिक उच्च माध्यमिक शाळांमध्ये राबविण्यात येणारा हा कार्यक्रम २,५०० प्रशिक्षण बॅचेस सुरू करेल, ज्यामध्ये महिलांसाठी ३६४ आणि कृत्रिम बुद्धिमत्ता, इंटरनेट ऑफ थिंग्ज, इलेक्ट्रिक वाहने, सौर ऊर्जा आणि अॅडिटीव्ह मॅन्युफॅक्चरिंग यासारख्या उदयोन्मुख तंत्रज्ञानावर लक्ष केंद्रित करणारे ४०८ बॅचेस असतील, असे निवेदनात म्हटले आहे.
