मुंबईत वाढत्या पाण्याच्या गरजेला तोंड देण्यासाठी महापालिका आता प्रक्रिया केलेल्या सांडपाण्याच्या वापराला प्रोत्साहन देत आहे. पिण्याव्यतिरिक्त कामांसाठी या शुद्ध पाण्याचा पर्याय मोठ्या प्रमाणात स्वीकारला जात असून त्याला संस्थांकडून चांगला प्रतिसाद मिळत आहे.
कुलाबा येथील सांडपाणी प्रक्रिया प्रकल्पाची एकूण क्षमता दररोज सुमारे ३७ दशलक्ष लिटर इतकी आहे. यापैकी सध्या १० दशलक्ष लिटर पाण्याचा पुनर्वापर केला जात आहे. हे पाणी प्रामुख्याने बांधकाम, उद्याने, स्वच्छता अशा पिण्याव्यतिरिक्त कामांसाठी उपलब्ध करून दिले जाते.
महापालिकेने या पाण्याचा दर प्रति १००० लिटर १५ रुपये निश्चित केला आहे, तर त्याचा उत्पादन खर्च सुमारे १२ रुपये आहे. त्यामुळे हा पर्याय आर्थिकदृष्ट्याही फायदेशीर ठरत आहे. या योजनेत खाजगी, निमशासकीय आणि शासकीय संस्थांनी पुढाकार घेतला आहे. एस.आर. एंटरप्राइजेस या महिला बचत गटाने दररोज सुमारे ३० लाख लिटर पाणी खरेदी करण्याची तयारी दर्शवली आहे. याशिवाय, मुंबई मेरीटाइम बोर्डलाही टेट्रापॉड प्रकल्पासाठी प्रति १००० लिटर २१ रुपये दराने पाणी पुरवण्याचा प्रस्ताव आहे.
महापालिकेचा हा उपक्रम भविष्यात आणखी विस्तारित होण्याची शक्यता असून संबंधित प्रस्ताव स्थायी समितीच्या मंजुरीसाठी सादर करण्यात आला आहे.
