पनीरची भाजी म्हटलं की लहानांपासून मोठ्यांपर्यंत सगळ्यांच्या तोंडाला पाणी सुटतं. त्यातल्या त्यात ‘मटार पनीर’ हे तर सदाबहार कॉम्बिनेशन आहे. अनेकदा घरच्या भाजीला हॉटेलसारखा रंग किंवा दाटसरपणा येत नाही. पण आज आम्ही तुम्हाला अशा काही ‘सिक्रेट’ टिप्स सांगणार आहोत, ज्यामुळे तुमची भाजी अगदी रेस्टॉरंटसारखी होईल.
साहित्य (Ingredients):
पनीर: 200 ग्रॅम (चौकोनी तुकडे केलेले)
ताजे किंवा फ्रोजन मटार: 1 वाटी
कांदा: 2 मध्यम (बारीक चिरलेले)
टोमॅटो प्युरी: 2 मोठ्या टोमॅटोची पेस्ट
आले-लसूण पेस्ट: 1 मोठा चमचा
काजू: 7-8 (पाण्यात भिजवून केलेली पेस्ट)
मसाले: 1 चमचा लाल तिखट, अर्धा चमचा हळद, 1 चमचा धणे पूड, 1 चमचा गरम मसाला.
पॅनमध्ये थोडे तेल किंवा तूप गरम करा. पनीरचे तुकडे हलके सोनेरी होईपर्यंत तळून घ्या. तळलेले पनीर लगेच कोमट पाण्यात टाका, यामुळे ते चामट न होता मऊ राहते.कढईत 2 मोठे चमचे तेल गरम करा. त्यात जिरे, तमालपत्र आणि दालचिनीचा तुकडा टाका. आता बारीक चिरलेला कांदा घालून तो गुलाबी होईपर्यंत परता. त्यानंतर आले-लसूण पेस्ट घालून कच्चा वास जाईपर्यंत परता. आता तयार टोमॅटो प्युरी आणि चवीनुसार मीठ टाका. टोमॅटोला तेल सुटेपर्यंत शिजवा. त्यानंतर हळद, लाल तिखट आणि धणे पूड टाकून मिक्स करा. ‘हॉटेल टच’ द्या: भाजीला हॉटेलसारखा रिचनेस येण्यासाठी यात काजूची पेस्ट टाका. यामुळे ग्रेव्ही दाट आणि चविष्ट होते. आता यात मटार घालून 2 मिनिटे वाफ काढा. पनीर आणि पाणी: गरजेनुसार थोडे कोमट पाणी घाला. ग्रेव्हीला उकळी आली की त्यात पाण्याचे पनीर उपसून टाका. 5 मिनिटे मंद आचेवर शिजवून घ्या. अंतिम तडका: शेवटी वरून गरम मसाला, थोडी कसुरी मेथी हातावर चोळून टाका आणि 1 चमचा ताजी साय (क्रीम) घाला. बारीक चिरलेली कोथिंबीर टाकून गॅस बंद करा.
