महायुद्धाची धग थेट किचनपर्यंत इंधन टंचाईने महाराष्ट्र होरपळला!
इराण आणि इस्रायल-अमेरिका यांच्यातील युद्धाला १५ दिवस उलटले असून, या जागतिक संघर्षाचे भीषण चटके आता महाराष्ट्रातील सर्वसामान्यांच्या घरापर्यंत पोहोचले आहेत. केंद्र सरकारने व्यावसायिक गॅस सिलिंडरवर निर्बंध लादल्याने राज्यात अभूतपूर्व ऊर्जा संकट निर्माण झाले आहे. मुंबईपासून बुलढाण्यापर्यंत आणि जळगावपासून सोलापूरपर्यंत गॅसचा तुटवडा इतका गंभीर झाला आहे की, आधुनिक काळातही लोकांना पुन्हा ‘चूल आणि मूळ’ या जुन्या संस्कृतीकडे वळावे लागत आहे.
हॉटेल व्यवसायाला घरघर आणि ‘गोवऱ्यां’चा आधार
गॅसअभावी राज्यातील हॉटेल व्यवसाय व्हेंटिलेटरवर आला आहे. सोलापूरच्या प्रसिद्ध ‘सुधा हॉटेल’ला तर चक्क “इडली मिळेल, पण सांभर संपले आहे” असा फलक लावावा लागला, कारण सांभर शिजवण्यासाठी गॅसच उपलब्ध नाही. अनेक ठिकाणी हॉटेल मालकांनी विटांच्या चुली मांडल्या आहेत. याच टंचाईमुळे कधीकाळी कवडीमोल समजल्या जाणाऱ्या शेणाच्या गोवऱ्यांना आता सोन्याचा भाव आला आहे. जळगावमध्ये ७ ते १० रुपयांना एक या दराने गोवऱ्यांची विक्री होत असून, पशुपालकांसाठी मात्र हा काळ ‘अच्छे दिन’ घेऊन आला आहे.
गुन्हेगारी आणि काळाबाजारात वाढ
गॅसच्या या हाहाकारात आता गुन्हेगारी प्रवृत्तीनेही डोके वर काढले आहे. बुलढाण्यातील टीबी हॉस्पिटलमधून चक्क भरलेले गॅस सिलिंडर आणि ऑक्सिजन पाईपलाईनची चोरी झाल्याची धक्कादायक घटना समोर आली आहे. दुसरीकडे, मुंबईच्या वरळी परिसरात घरगुती सिलिंडरचा काळाबाजार करणाऱ्या टोळीचा पर्दाफाश करण्यात आला असून, टंचाईचा फायदा घेऊन लूट करणाऱ्यांवर प्रशासनाने कारवाईचा बडगा उगारला आहे.
इलेक्ट्रिक शेगड्यांचा आधार, पण दुकानदारांत संताप
मुंबईतील सीएसएमटी बाहेरील खाऊ गल्लीत दुकानदार आता इलेक्ट्रिक शेगड्यांवर कसाबसा स्वयंपाक करत आहेत. मात्र, यामुळे व्यवसायावर मर्यादा येत असल्याने अनेक दुकानदारांनी आपला गाशा गुंडाळून गावी जाण्याचा निर्णय घेतला आहे. “सरकार केवळ आश्वासने देऊन आम्हाला मूर्ख बनवत आहे,” अशी संतप्त प्रतिक्रिया येथील व्यावसायिकांनी दिली आहे. एकूणच, युद्धाच्या या झळांमुळे महाराष्ट्राची अर्थव्यवस्था आणि सामान्य माणसाचे ताट दोन्ही संकटात सापडले आहेत.
