त्वचा उजळ आणि डागमुक्त ठेवण्यासाठी व्हिटॅमिन C अत्यंत महत्त्वाचे मानले जाते. त्यामुळे अनेकजण चेहऱ्याची चमक वाढवण्यासाठी व्हिटॅमिन C सीरमचा वापर करतात. मात्र, हे सीरम नेमक्या कोणत्या वेळी आणि कशा प्रकारे वापरावे, याबाबत अनेकांना स्पष्ट माहिती नसते. चुकीच्या पद्धतीने वापरल्यास त्वचेला फायदे होण्याऐवजी त्रासही होऊ शकतो.
व्हिटॅमिन C हे प्रभावी अँटिऑक्सिडंट असल्यामुळे ते त्वचेला सूर्यप्रकाश, प्रदूषण आणि धुळीपासून संरक्षण देते. त्यामुळे सकाळी चेहरा स्वच्छ केल्यानंतर हे सीरम लावणे अधिक फायदेशीर ठरते. मात्र, त्यानंतर सनस्क्रीन लावणे अत्यावश्यक आहे.
रात्रीच्या वेळीही व्हिटॅमिन C वापरता येते, कारण त्यावेळी त्वचेच्या पेशींची दुरुस्ती होते. पण जर तुम्ही इतर स्किनकेअर उत्पादने वापरत असाल, तर त्यांच्यासोबत व्हिटॅमिन C मिसळणे टाळावे. यामुळे त्वचेवर जळजळ किंवा मुरुमांची समस्या निर्माण होऊ शकते.
सीरम वापरताना प्रमाण महत्त्वाचे आहे. चेहऱ्यावर फक्त २ ते ३ थेंब हलक्या हाताने लावावेत. चेहरा स्वच्छ धुवून पूर्णपणे कोरडा केल्यानंतरच सीरम वापरणे योग्य ठरते. तसेच, सीरमचा रंग बदलून गडद नारंगी किंवा तपकिरी झाल्यास तो वापरणे टाळावे, कारण तो ऑक्सिडाइज झालेला असतो.
पहिल्यांदाच वापरताना पॅच टेस्ट करणे गरजेचे आहे, जेणेकरून कोणतीही ऍलर्जी आहे का ते समजू शकते. त्वचेच्या विशिष्ट समस्यांसाठी कोणतेही उत्पादन वापरण्यापूर्वी डॉक्टरांचा सल्ला घेणेही आवश्यक आहे.
यासोबतच, त्वचा निरोगी ठेवण्यासाठी लिंबू, संत्री, टोमॅटो आणि आवळा यांसारख्या व्हिटॅमिन C युक्त पदार्थांचा आहारात समावेश करणे फायदेशीर ठरते. संतुलित आहार आणि नियमित व्यायाम देखील त्वचेच्या आरोग्यासाठी तितकेच महत्त्वाचे आहेत.
