मुख्यमंत्री माझी लाडकी बहीण योजनेच्या (Ladki Bahin Yojana) लाभार्थी महिलांसाठी एक महत्त्वाचं अपडेट समोर आलं आहे. राज्य सरकारकडून सप्टेंबर आणि ऑक्टोबर महिन्याचे हप्ते दिवाळीपूर्वी वितरित होण्याची शक्यता आहे. मात्र, त्याआधीच ई-केवायसी (eKYC) प्रक्रिया पूर्ण करणे आवश्यक असल्याचे सांगण्यात येत आहे.
सध्या सरकारने सप्टेंबर आणि ऑक्टोबरच्या हप्त्यांसाठी ई-केवायसी बंधनकारक केल्याचा कोणताही अधिकृत निर्णय घेतलेला नाही. पण नोव्हेंबरपासून या प्रक्रियेला अनिवार्यता येऊ शकते. म्हणजेच, जर ई-केवायसी पूर्ण नसेल तर नोव्हेंबरचा आणि त्यानंतरचे हप्ते थांबू शकतात.
अनेक लाभार्थींना ई-केवायसी करताना तांत्रिक अडचणी येत आहेत . पोर्टलवर लॉगिन, अपलोडिंग आणि ओटीपी पडताळणीसंबंधी त्रुटी वारंवार दिसत आहेत. तरीही शासनाने दोन महिन्यांचा अवधी दिला आहे, त्यामुळे महिलांना या काळात प्रक्रिया पूर्ण करण्याची संधी आहे.
ई-केवायसी करण्यासाठी लाभार्थींनी ladkibahin.maharashtra.gov.in या संकेतस्थळाला भेट द्यावी आणि पुढील पद्धतीने प्रक्रिया करावी:
- पोर्टलवर लॉगिन करून “e-KYC” पर्याय निवडा.
- आधार क्रमांक व कॅप्चा टाका आणि ‘Send OTP’ वर क्लिक करा.
- आधारशी लिंक मोबाईलवर आलेला OTP भरून ‘Submit’ करा.
- नंतर पती किंवा वडिलांचा आधार क्रमांक भरा.
- जात प्रवर्ग निवडा, घोषणापत्रावर क्लिक करा आणि माहिती पडताळून ‘Submit’ करा.
ही प्रक्रिया यशस्वीरित्या पूर्ण झाल्यानंतर “e-KYC Verification Successful” असा संदेश स्क्रीनवर दिसेल.
