भारत–पाक सामन्याआधी वैयक्तिक आयुष्याची चर्चा रंगली
टी-२० विश्वचषक २०२६ मध्ये आज १५ फेब्रुवारीला भारत–पाकिस्तान हाय-व्होल्टेज सामना रंगत असताना, मैदानाबाहेर टीम इंडियाच्या सलामीवीर ईशान किशन याच्याबाबत मोठी चर्चा सुरू झाली आहे. कोलंबोतील सामन्यापूर्वी त्याच्या लग्नाविषयी आणि नातेसंबंधांबाबत महत्त्वाची माहिती समोर आली आहे.
ईशानचे आजोबा अनुराग पांडे यांनी एका वृत्तसंस्थेशी संवाद साधताना नातवाच्या वैयक्तिक आयुष्याबद्दल भाष्य केले. त्यांनी सांगितले की, ईशानने घरी एका मुलाखतीदरम्यान अदितीने त्याचे कौतुक केल्याचे सांगितले होते. इतकेच नव्हे, तर तिने ईशानचे आजोबा देखणे दिसतात, असेही म्हटल्याचा उल्लेख त्यांनी केला.
लग्नाच्या चर्चांवर बोलताना अनुराग पांडे यांनी स्पष्ट केले की, ईशान आपल्या आयुष्यातील मोठे निर्णय स्वतंत्रपणे घेऊ शकतो. कुटुंब त्याच्या निवडीचा सन्मान करेल, असे त्यांनी नमूद केले. मोठ्या भावानेही स्वतःच्या पसंतीने विवाह केला आणि कुटुंबाने त्याला पाठिंबा दिला, अशी माहिती देत त्यांनी घरातील परंपरेत मुलांच्या आनंदाला प्राधान्य दिले जाते, असे सांगितले.
अदितीबाबत विचारले असता, त्यांनी उघडपणे सांगितले की अदिती हुंडिया ही ईशानची गर्लफ्रेंड आहे. जयपूरची असलेली अदिती मॉडेलिंग क्षेत्रात कार्यरत असून, ती मिस इंडिया स्पर्धेत उपविजेती ठरली होती. ईशान आणि अदिती एकमेकांना डेट करत असल्याच्या चर्चा याआधीही रंगल्या होत्या; मात्र आता आजोबांच्या वक्तव्यानंतर त्या चर्चांना अधिकृत दुजोरा मिळाल्याचे मानले जात आहे.
दरम्यान, ईशान किशन सध्या विश्वचषक स्पर्धेत व्यस्त आहे. अमेरिकेविरुद्ध मोठी खेळी करण्यात तो अपयशी ठरला असला, तरी नामिबियाविरुद्ध अवघ्या २४ चेंडूत ६० धावांची आक्रमक खेळी करत त्याने आपली छाप पाडली. आता पाकिस्तानविरुद्धच्या सामन्यात तो कशी कामगिरी करतो, याकडे चाहत्यांचे लक्ष लागले आहे.
