अंघोळीमुळे दुर्गंधी किंवा त्वचेवरील संसर्ग यांसारख्या तक्रारी होतात कमी.
आंघोळ (Bath) ही फक्त स्वच्छता राखण्यापुरती मर्यादित नसून ती शरीर आणि मनासाठी एक दैनंदिन उपचार मानली जाते. दिवसभर बाहेर गेल्यावर त्वचेला धूळ, घाम, प्रदूषण आणि जंतूंचा सामना करावा लागतो. आंघोळीमुळे हे सर्व घटक दूर होतात आणि त्वचेचा श्वास मोकळा होतो. त्यामुळे पुरळ, दुर्गंधी किंवा त्वचेवरील संसर्ग यांसारख्या तक्रारी कमी होतात. गरम किंवा कोमट पाण्याची आंघोळ स्नायूंचा ताण हलका करते, रक्ताभिसरण सुधारते आणि शरीराला सौम्य विश्रांती मिळवून देते. जसे सकाळी आंघोळ ऊर्जा देते, तसेच संध्याकाळची आंघोळ दिवसभराचा थकवा धुवून टाकते आणि झोप अधिक शांत बनवते. या प्रक्रियेने मन प्रसन्न राहते आणि मानसिक तणावही कमी होतो. व्यायामानंतर आंघोळ केल्यास घामातील जंतू दूर होऊन त्वचा ताजेतवानी होते. नियमित आंघोळीमुळे प्रतिकारशक्तीही बळकट होते, कारण शरीर स्वच्छ (Clean body)असल्याने संसर्गाचा धोका कमी होतो.
अनेकांना दिवसा आंघोळ करायला आवडते, पण रात्रीची आंघोळही तितकीच फायदेशीर ठरू शकते. दिवसभराच्या दगदगीत रात्रीची आंघोळ शरीरातील ताण, धूळ आणि थकवा साफ करून आराम देते. ही फक्त स्वच्छतेची सवय नसून आधुनिक जीवनशैलीत एक प्रकारची मिनी-थेरपी ठरू शकते. रात्री आंघोळ करण्याचा सर्वात मोठा फायदा म्हणजे त्वचेची योग्य निगा राखणे. जर झोपण्यापूर्वी चेहरा आणि शरीरावरची धूळ-प्रदूषण निघाली नाही तर छिद्रं बंद होऊन पिंपल्स व त्वचेच्या समस्या वाढतात. रात्रीची आंघोळ त्वचेला नैसर्गिक दुरुस्तीची संधी देते. त्याचप्रमाणे केसांमध्ये साचलेली धूळही निघून टाळू निरोगी राहते.
झोपेच्या समस्यांनी त्रस्त असाल तर झोपण्यापूर्वीची कोमट पाण्याची आंघोळ जादू करू शकते. आंघोळीमुळे शरीराचं तापमान थोडं वाढतं आणि नंतर थंड झाल्यावर मेंदूला विश्रांतीचा संदेश मिळतो. यामुळे झोप सहज आणि खोल लागते. म्हणूनच झोप सुधारण्यासाठी तज्ञ सुद्धा रात्री आंघोळ करण्याचा सल्ला देतात. दिवसभराच्या धावपळीनंतर शरीरात ताण आणि थकवा साठतो. अशावेळी रात्रीची आंघोळ एक प्रकारची ‘डिटॉक्स रिच्युअल’ म्हणून काम करते. पाण्याचा स्पर्श स्नायू मोकळे करतो, रक्तप्रवाह सुधारतो आणि मन हलकं करून देतो. अनेक जण याला ‘डे-एंड क्लीन्स’ म्हणतात—दिवसाचा थकवा धुवून नव्या ऊर्जेने झोपेत जाण्यास मदत करणारी प्रक्रिया.
