इराण आणि अमेरिका यांच्यातील संघर्ष अत्यंत गंभीर टप्प्यावर पोहोचला असून परिस्थिती दिवसेंदिवस अधिक धोकादायक बनत आहे. 6 एप्रिलपर्यंत युद्धबंदीबाबत घोषणा करण्यात आली असली, तरी प्रत्यक्षात दोन्ही बाजूंनी हल्ले सुरूच असल्याचे दिसत आहे.
गेल्या काही तासांत इराणमध्ये स्फोटांचे मोठे आवाज ऐकू आले असून, प्रत्युत्तरादाखल इराणनेही जोरदार कारवाई करत इस्त्रायल आणि अमेरिकेला लक्ष्य केले आहे. विशेषतः यरूशलममध्ये अनेक ठिकाणी स्फोट झाल्याने परिस्थिती अधिक तणावपूर्ण झाली आहे. यावर प्रतिक्रिया देताना IDF ने आपली संरक्षण प्रणाली सक्रिय असल्याचे सांगितले आहे.
दरम्यान, इस्त्रायलकडूनही इराणमधील ठिकाणांवर हल्ले सुरूच असून दोन्ही बाजूंनी आक्रमक भूमिका घेतली आहे. या सततच्या संघर्षामुळे युद्ध थांबवण्याबाबत कोणतीही सकारात्मक चिन्हे दिसत नाहीत.
तणावाचे आणखी एक मोठे कारण म्हणजे होर्मुज खाडी अजून पूर्णपणे खुली न झाल्याने अनेक देशांची जहाजे अडकून पडली आहेत. यामुळे आंतरराष्ट्रीय व्यापारावरही परिणाम होत आहे.
या पार्श्वभूमीवर डोनाल्ड ट्रम्प यांच्या सहकाऱ्याने युद्ध थांबवण्याची तयारी दर्शवली असल्याचे वृत्त आहे. मात्र, इराणने आपल्या अटी स्पष्ट करत त्या मान्य झाल्याशिवाय कोणत्याही प्रकारचा युद्धबंदी करार होणार नाही, असे ठामपणे सांगितले आहे.
अमेरिकेकडून काही कठोर इशारे देण्यात आले असले तरी इराणने आपली भूमिका कायम ठेवली आहे. त्यामुळे हा संघर्ष आणखी वाढण्याची भीती व्यक्त केली जात आहे.
