भारत-अमेरिका टी-20 सामन्यादरम्यान सूर्यकुमार यादवच्या खेळीचा जल्लोष करताना स्टेडियममध्ये थिरकली अभिनेत्री-कंटेंट क्रिएटर तन्वी गडकरी
मुंबईस्थित अभिनेत्री, नृत्यांगना आणि डिजिटल कंटेंट क्रिएटर तन्वी गडकरी सध्या सोशल मीडियावर चर्चेचा केंद्रबिंदू ठरत आहे. ICC टी-20 विश्वचषक 2026 अंतर्गत भारत विरुद्ध अमेरिका सामन्यादरम्यान मुंबईच्या वानखेडे स्टेडियममध्ये तिने केलेला उत्स्फूर्त डान्स प्रेक्षकांसह सोशल मीडियावरही तुफान व्हायरल झाला आहे.
टीम इंडियाचा कर्णधार सूर्यकुमार यादव याने शानदार फलंदाजी करताच स्टेडियममध्ये उत्साहाचं वातावरण निर्माण झालं. याच जल्लोषात कॅमेऱ्याची नजर थेट प्रेक्षकांमध्ये उभ्या असलेल्या तन्वी गडकरीवर पडली. भारतीय संघाची जर्सी परिधान करून आनंदात थिरकणारी तन्वी थेट लाईव्ह टीव्ही प्रसारणात झळकली आणि काही क्षणांतच प्रेक्षकांचं लक्ष वेधून घेतलं.
या खास क्षणाचा व्हिडीओ तन्वीने स्वतः तिच्या इंस्टाग्राम अकाउंटवर शेअर केला आहे. कॅप्शनमध्ये तिने सांगितलं की, “हा माझ्या आयुष्यातील पहिलाच क्रिकेट सामना होता, जो मी थेट स्टेडियममध्ये पाहिला. मॅचदरम्यान कॅमेरा मला डान्स करताना टिपेल, असं स्वप्नातही वाटलं नव्हतं.”
हा क्षण तिच्या चाहत्यांसाठीही खास ठरला असून व्हिडीओवर लाखो व्ह्यूज आणि कमेंट्सचा पाऊस पडत आहे.
तन्वी गडकरीने आपल्या अभिनय कारकिर्दीची सुरुवात वेब सीरिज आणि म्युझिक व्हिडीओंमधून केली. ‘कॅम्पस बीट’ या लोकप्रिय वेब सीरिजमधील तिची रिहाना ही भूमिका विशेष गाजली आणि तिला मोठी ओळख मिळाली. याशिवाय ‘जमनापार’सारख्या वेब सीरिजमध्येही तिने प्रभावी काम केलं आहे.
अभिनयासोबतच नृत्य ही तन्वीची खरी ताकद आहे. विविध म्युझिक व्हिडीओ आणि डान्स रील्समधून तिने आपलं कौशल्य सिद्ध केलं असून सोशल मीडियावर तिचा मोठा चाहता वर्ग निर्माण झाला आहे. डान्स रील्स, लाइफस्टाइल पोस्ट्स आणि ब्रँड कोलॅबोरेशन कंटेंटसाठी ती विशेष ओळखली जाते.
आज तन्वी गडकरी केवळ अभिनेत्री म्हणूनच नाही, तर एक यशस्वी डिजिटल कंटेंट क्रिएटर म्हणूनही स्वतःची वेगळी ओळख निर्माण करत आहे. तिची लोकप्रियता दिवसेंदिवस वाढत असून, वानखेडेवरील हा व्हायरल क्षण तिच्या करिअरमधील आणखी एक खास टप्पा ठरत आहे.
