२८ फेब्रुवारी २०२६ रोजी सुरू झालेल्या इराण-अमेरिका युद्धाने आता अत्यंत भीषण वळण घेतले असून, जगाची ‘लाईफलाईन’ समजली जाणारी होर्मुजची खाडी या संघर्षाचे मुख्य केंद्र बनली आहे. कच्च्या तेलाच्या आणि एलपीजी गॅसच्या वाहतुकीसाठी अत्यंत महत्त्वाचा असलेला हा मार्ग बंद झाल्याच्या वृत्ताने जागतिक बाजारात खनिज तेलाच्या किमती गगनाला भिडल्या आहेत. अनेक देशांसमोर ऊर्जा संकट उभे राहिले असून आर्थिक आणीबाणीची भीती व्यक्त केली जात आहे. अमेरिकेने हा मार्ग मोकळा करण्यासाठी थेट लष्करी हस्तक्षेप करण्याचा इशारा दिला असून, इराणला ४८ तासांची मुदत दिली आहे. जर इराणने ही कोंडी फोडली नाही, तर त्यांच्या ऊर्जा प्रकल्पांवर थेट हल्ले करण्याची धमकी अमेरिकेने दिली आहे, ज्यामुळे युद्धाचा वणवा अधिकच पेटण्याची शक्यता आहे.
दुसरीकडे, इराणने अमेरिकेच्या या दबावापुढे झुकण्यास स्पष्ट नकार दिला आहे. इराणचे परराष्ट्र मंत्री अब्बास अराघची यांनी ठामपणे सांगितले की, “आम्ही कोणाच्याही धमक्यांना घाबरत नाही; अमेरिकेने सन्मानाची भाषा बोलावी.” इराणच्या मते, त्यांनी खाडी अधिकृतपणे बंद केलेली नाही, परंतु युद्धाच्या परिस्थितीमुळे विमा कंपन्या आणि जहाजांनी या मार्गावरून जाणे टाळले आहे. मात्र, इराणने हे देखील स्पष्ट केले आहे की, ते त्यांच्या विरोधात असलेल्या शत्रू देशांच्या जहाजांना या मार्गावरून जाऊ देणार नाहीत. आत्मरक्षणाचा अधिकार वापरून होर्मुज खाडीचा वापर इराणविरोधी कारवायांसाठी होऊ दिला जाणार नाही, असा इशाराही इराणने दिला आहे. सध्या या मार्गावर इराणने सुरक्षा व्यवस्था कडक केली असून, अमेरिका आणि इराणमधील हा ‘ईगो’ वॉर संपूर्ण जगाला अंधाराच्या खाईत लोटतो की काय, अशी चिंतेची स्थिती निर्माण झाली आहे.
