कफ, सायनस आणि पचनाच्या समस्या असलेल्या महिलांनी वेळीच व्हावे सतर्क; तज्ज्ञांनी दिला मोलाचा सल्ला
दही हे प्रोबायोटिक्स आणि पोषक तत्वांचा खजिना मानले जात असले, तरी ते खाण्याची वेळ चुकीची असल्यास फायद्याऐवजी नुकसान होऊ शकते. विशेषतः महिलांच्या आरोग्यावर रात्री दही खाण्याचे विपरित परिणाम दिसून येतात. आयुर्वेदानुसार दही हे ‘थंड’ प्रवृत्तीचे अन्न आहे, जे रात्रीच्या वेळी शरीरातील कफ दोष वाढवण्यास कारणीभूत ठरते. ज्या महिलांना सकाळी उठल्यावर नाक चोंदणे, घसा खवखवणे किंवा छातीत कफ जमा होण्याचा त्रास होतो, त्यांनी रात्रीच्या आहारात दह्याचा समावेश करणे टाळले पाहिजे, कारण यामुळे सायनस आणि श्वसनाचे विकार बळावू शकतात.
रात्रीच्या वेळी शरीराची पचनसंस्था मंदावलेली असते. अशा वेळी दही खाल्ल्याने अपचन, गॅस आणि पोट फुगण्यासारख्या समस्या निर्माण होतात. ज्या महिलांची पचनशक्ती आधीच कमकुवत आहे, त्यांच्यासाठी रात्रीचे दही ‘अॅसिडिटी’चे कारण ठरू शकते. इतकेच नाही, तर ज्यांना वारंवार मुरुमे किंवा त्वचेची खाज सुटण्यासारखे त्रास आहेत, त्यांच्यासाठी दह्यातील आंबटपणा दाह (Inflammation) वाढवू शकतो. सांधेदुखी किंवा अंगदुखीचा त्रास असलेल्या व्यक्तींना रात्री दही खाल्ल्याने सकाळी शरीरात ताठरपणा (Stiffness) जाणवण्याची शक्यता असते.
दही खाण्याची योग्य पद्धत आणि वेळ
आरोग्य तज्ज्ञांच्या मते, दही खाण्याची सर्वोत्तम वेळ ही दुपारची आहे. दह्याचे पूर्ण फायदे मिळवण्यासाठी खालील गोष्टींचे पालन करा:
- दुपारचे जेवण: दुपारच्या जेवणासोबत एक वाटी ताजे दही खाणे पचनासाठी सर्वोत्तम ठरते.
- मसाल्यांचा वापर: दही नुसते खाण्याऐवजी त्यात जिरे पूड, हिंग, काळे मीठ, काळी मिरी किंवा पुदिना टाकून खावे. यामुळे दह्याचा थंड प्रभाव कमी होतो आणि पचन सुलभ होते.
- रात्री खायचेच असेल तर: जर तुम्हाला रात्री दही खायची इच्छा झालीच, तर त्यात थोडी साखर किंवा मिरी पूड मिसळा, जेणेकरून त्याचा कफ निर्माण करणारा गुणधर्म मर्यादित राहील.
थोडक्यात सांगायचे तर, आपली प्रकृती ओळखून दह्याचे सेवन करणे आरोग्यासाठी हिताचे आहे. तुम्हाला वारंवार सर्दी-खोकल्याचा त्रास होत असल्यास रात्रीच्या वेळी दह्याला ‘नो’ म्हणणेच उत्तम!
