साल न काढता खाल्ल्या जाणाऱ्या भाज्या देतात जास्त पोषण – तज्ञांचा सल्ला
आपण रोज स्वयंपाक करताना अनेक भाज्यांची साले सवयीने काढून टाकतो. मात्र तज्ञांच्या मते, हाच सवयीचा निर्णय आपल्या शरीराला आवश्यक असलेले अनेक पोषक घटक हिरावून घेतो. कारण अनेक भाज्यांच्या सालींमध्ये फायबर, जीवनसत्त्वे, खनिजे आणि अँटिऑक्सिडंट्स मोठ्या प्रमाणात असतात. त्यामुळे काही भाज्या स्वच्छ धुवून सालीसह खाल्ल्या तर आरोग्याला जास्त फायदा होतो. चला जाणून घेऊया अशाच काही भाज्यांबद्दल…
बटाटा
बहुतेक घरांमध्ये बटाटा सोलूनच शिजवला जातो. पण बटाट्याच्या सालीमध्ये फायबर, पोटॅशियम आणि लोह भरपूर असते. साल काढल्यास हे पोषण कमी होते. सालीसह बटाटा खाल्ल्यास पचन सुधारते आणि पोट जास्त वेळ भरलेले राहते. त्यामुळे बटाटे नीट धुवून सालीसह शिजवणे फायदेशीर ठरते.
काकडी
काकडीची साल फायबर आणि व्हिटॅमिन K ने समृद्ध असते. ही साल हृदयाच्या आरोग्यासाठी उपयुक्त असून शरीर हायड्रेट ठेवण्यास मदत करते. तसेच अँटिऑक्सिडंट्समुळे वजन नियंत्रणात ठेवण्यास आणि पचनक्रिया सुधारण्यास काकडीची साल उपयोगी ठरते.
गाजर
गाजराची साल अतिशय पातळ असून त्यात फायटोन्युट्रिएंट्स मोठ्या प्रमाणात असतात. ही पोषक द्रव्ये शरीरातील दाह कमी करण्यास मदत करतात. त्यामुळे गाजर सोलण्याऐवजी ते पाण्याने स्वच्छ धुवून सालीसह खाणे अधिक आरोग्यदायी आहे.
दोडका आणि भोपळा
कोवळ्या दोडक्याची साल फायबरने भरलेली असल्याने ती काढू नये. जर काढलीच, तर तिची चटणी करून खाल्ली तरी पोषण मिळू शकते. भोपळ्याच्या सालीमध्ये झिंक आणि बीटा-कॅरोटीन असते, जे त्वचा आणि प्रतिकारशक्तीसाठी फायदेशीर मानले जाते. त्यामुळे भोपळ्याची भाजी सालीसह केल्यास आरोग्याला दुहेरी फायदा होतो.
थोडक्यात काय तर…
भाज्यांची साल म्हणजे कचरा नाही, तर पोषणाचा खजिना आहे. फक्त भाज्या नीट स्वच्छ करून सालीसह खाण्याची सवय लावली, तर आरोग्य आपोआप सुधारेल.
