दिवाळीत प्रेक्षकांचा कौल आऊटसाइडर्सना; हर्षवर्धन-आयुषमानच्या चित्रपटांना तुफान प्रतिसाद, 34 कोटींची कमाई
बॉलिवूडमध्ये अनेक वर्षांच्या कठोर मेहनतीनंतर अभिनेता हर्षवर्धन राणे (Harshvardhan Rane) याला अखेर यशाची चव चाखायला मिळाली आहे. त्याचा रोमँटिक ड्रामा ‘एक दिवाने की दिवानियत’ (Ek Deewane Ki Deewaniyat) हा चित्रपट यंदाच्या दिवाळीत 21 ऑक्टोबर रोजी प्रदर्शित झाला आणि बॉक्स ऑफिसवर धमाकेदार यश मिळवत आहे. अवघ्या पाच दिवसांत या चित्रपटाने भारतात 34 कोटी रुपये आणि जगभरात 45 कोटी रुपये कमावले आहेत. विशेष म्हणजे, 25 कोटींच्या माफक बजेटमध्ये बनलेला हा चित्रपट आधीच सुपरहिट ठरला असून, हर्षवर्धनच्या करिअरमधील सर्वात मोठी ओपनिंग करणारा चित्रपट बनला आहे. या यशाने त्याने अजय देवगणच्या ‘सन ऑफ सरदार 2’सह यंदाच्या 26 चित्रपटांना मागे टाकले आहे. दिवाळीच्या उत्साहात हर्षवर्धन आणि चित्रपटातील सहअभिनेत्री सोनम बाजवा (Sonam Bajwa) यांनी गुजरातमधील एका थिएटरमध्ये चित्रपटाच्या स्क्रीनिंगला हजेरी लावली. यावेळी प्रेक्षकांचा उत्साह पाहून हर्षवर्धनने त्यांचे आभार मानले आणि बॉलिवूडमधील घराणेशाहीवर खोचक टिप्पणी केली.
एका पापाराझी व्हिडीओत तो म्हणाला, “या दिवाळीत तुम्ही दोन्ही आऊटसाइडर कलाकारांच्या चित्रपटांना पाठिंबा दिला. माझ्या ‘एक दिवाने की दिवानियत’सोबतच आयुषमान खुरानाचा ‘थमा’ही प्रदर्शित झाला आहे. दोन्ही चित्रपट बघा, मजा करा. तुमच्या या पाठिंब्याने बॉलिवूडमधील घराणेशाही संपवण्याचा संदेश स्पष्ट होतो.” त्याच्या या वक्तव्याने प्रेक्षकांनी टाळ्यांचा कडकडाट केला, तर हर्षवर्धनने हात जोडून कृतज्ञता व्यक्त केली.याचवेळी प्रदर्शित झालेल्या आयुषमान खुरानाच्या ‘थमा’ या चित्रपटानेही बॉक्स ऑफिसवर दमदार कामगिरी केली आहे. या चित्रपटाने भारतात 78 कोटी रुपये आणि जगभरात 110 कोटी रुपये कमावले आहेत. दोन्ही चित्रपटांना मिळणारा हा प्रचंड प्रतिसाद बॉलिवूडमधील नव्या चेहऱ्यांना प्रेक्षकांचा पाठिंबा असल्याचे दर्शवतो. सोशल मीडियावर हर्षवर्धनच्या या विधानाला नेटकऱ्यांनी उत्स्फूर्त प्रतिसाद दिला आहे.
एका युजरने लिहिले, “हर्षवर्धनने दुसऱ्या कलाकाराच्या चित्रपटाचंही कौतुक केलं, याने खरंच मन जिंकलं!” दुसऱ्याने म्हटलं, “प्रेक्षकच खरी ताकद आहे, आणि हर्षवर्धनने हे ओळखलं.” आणखी एकाने टिप्पणी केली, “आऊटसाइडर्सना पाठिंबा देणाऱ्या प्रेक्षकांनी बॉलिवूडला नवा संदेश दिलाय.”मिलाप झवेरी दिग्दर्शित ‘एक दिवाने की दिवानियत’ हा चित्रपट हर्षवर्धनच्या अभिनय आणि कथेच्या जोरावर प्रेक्षकांची पसंती मिळवत आहे. हा चित्रपट आणि त्याच्याशी स्पर्धा करणाऱ्या ‘थमा’ने बॉलिवूडमधील नव्या कलाकारांना प्रोत्साहन देणारा ट्रेंड सेट केला आहे. हर्षवर्धनच्या या यशाने त्याच्या चाहत्यांमध्ये उत्साह संचारला असून, त्याच्या पुढील प्रवासाकडे सगळ्यांचे लक्ष लागले आहे.
