MCX आणि किरकोळ बाजारात मोठी पडझड; खरेदीदारांसाठी दिलासादायक संधी
गेल्या काही दिवसांपासून सराफा बाजारात सुरू असलेली झपाट्याने वाढ शुक्रवारी अचानक थांबली. सोनं आणि चांदीच्या वाढत्या किमतींमुळे चिंतेत असलेल्या ग्राहकांसाठी ही घसरण दिलासा देणारी ठरली आहे. 29 जानेवारीला विक्रमी पातळी गाठल्यानंतर 30 जानेवारी रोजी सकाळपासूनच बाजारात अस्थिरता पाहायला मिळाली.
मल्टी कमोडिटी एक्सचेंज (MCX) वर सोनं आणि चांदी या दोन्ही मौल्यवान धातूंमध्ये मोठी घसरण नोंदवली गेली. सुरुवातीच्या व्यवहारात दोन्ही धातू 5 टक्क्यांपेक्षा अधिक घसरले. एमसीएक्सवर सोन्याचा दर 5.55 टक्क्यांनी खाली येत 1,60,001 रुपये प्रति 10 ग्रॅमपर्यंत घसरला. विशेष म्हणजे, काही दिवसांपूर्वीच सोन्याने 1,93,096 रुपयांचा सर्वकालीन उच्चांक गाठला होता. आजच्या व्यवहारात मात्र सोन्याच्या किमतीत सुमारे 9,400 रुपयांची घसरण झाली.
चांदीच्या बाजारातही अशीच स्थिती पाहायला मिळाली. चांदीचा दर 4.18 टक्क्यांनी घसरून 3,83,177 रुपये प्रति किलोवर आला. एका दिवसात चांदीत तब्बल 16,700 रुपयांची घट झाली. गुरुवारी चांदीने 4,20,048 रुपये प्रति किलोचा विक्रम केला होता, मात्र नफा वसुलीमुळे आज दर खाली आले.
फक्त फ्युचर्स मार्केटच नव्हे, तर किरकोळ बाजारातही मंदी जाणवली. बुलियन बाजारातील आकडेवारीनुसार, आज सोन्याचा किरकोळ दर सुमारे 5,300 रुपयांनी घसरून 1,65,180 रुपये प्रति 10 ग्रॅम झाला. त्याचवेळी चांदीचा दरही 23,360 रुपयांनी कमी होऊन 3,79,130 रुपये प्रति किलोवर आला.
आंतरराष्ट्रीय बाजारातील घडामोडींचाही भारतीय बाजारावर परिणाम झाला. जागतिक स्तरावर स्पॉट गोल्डमध्ये 1.65 टक्क्यांची घसरण होऊन तो 5,217 डॉलर प्रति औंसवर आला, जो याआधी 5,594.82 डॉलरच्या विक्रमी उच्चांकावर होता. स्पॉट चांदीचे दरही 2.86 टक्क्यांनी घसरून 110 डॉलर प्रति औंस झाले.
एकूणच, अचानक झालेल्या या घसरणीमुळे बाजारात खळबळ उडाली असली तरी, सामान्य ग्राहकांसाठी सोनं-चांदी खरेदी करण्याची ही चांगली संधी मानली जात आहे.
