फक्त पाणी नाही, वाफेत मिसळा या दोन नैसर्गिक गोष्टी; स्किनकेअर एक्सपर्ट्सचा खास सल्ला
चेहऱ्यावर वाफ घेणे ही स्किनकेअरमधील जुनी पण अत्यंत परिणामकारक पद्धत मानली जाते. योग्य प्रकारे फेस स्टीम घेतल्यास त्वचेची छिद्रे उघडतात, आत साचलेली घाण बाहेर पडते आणि त्वचा खोलवर स्वच्छ होते. अनेक जण साध्या पाण्याची वाफ घेतात, मात्र तज्ज्ञांच्या मते वाफेच्या पाण्यात काही नैसर्गिक घटक मिसळल्यास त्याचा फायदा दुपटीने वाढतो.
वाफ घेणे केवळ सौंदर्यासाठीच नव्हे तर आरोग्यासाठीही उपयुक्त ठरते. सर्दी, खोकला किंवा सायनसचा त्रास असताना गरम वाफ घेतल्याने कफ पातळ होतो, श्वसनमार्ग मोकळा होतो आणि घशातील खवखव कमी होते. यामुळे श्वास घेणे सुलभ होते आणि शरीर हायड्रेट राहण्यास मदत मिळते.
सौंदर्याच्या दृष्टीने पाहिल्यास, फेस स्टीममुळे त्वचेवरील छिद्रे उघडतात. या छिद्रांमध्ये साचलेली धूळ, प्रदूषण आणि अतिरिक्त तेल सहज निघून जाते. परिणामी ब्लॅकहेड्स, व्हाईटहेड्स आणि मुरुमांची समस्या कमी होते. तसेच रक्ताभिसरण सुधारल्याने त्वचेला अधिक ऑक्सिजन मिळतो आणि चेहऱ्यावर नैसर्गिक चमक येते.
स्किनकेअर एक्सपर्ट्स सांगतात की, साध्या पाण्याऐवजी जर वाफेच्या पाण्यात संत्र्याची साल आणि बीटरूटच्या पानांचे छोटे तुकडे घातले, तर त्याचा परिणाम अधिक चांगला दिसून येतो. यासाठी पाणी उकळून त्यात ही दोन्ही घटक घालावेत. नंतर गॅस बंद करून डोक्यावर टॉवेल घेऊन हळूवार वाफ घ्यावी. या वाफेमुळे त्वचेला नैसर्गिक जीवनसत्त्वे मिळतात, छिद्रे स्वच्छ होतात आणि त्वचा आतून उजळते.
तज्ज्ञांच्या मते, ही फेस स्टीम आठवड्यातून दोन ते तीन वेळा घेणे पुरेसे आहे. जर त्वचा खूप कोरडी असेल, तर वाफ घेण्यापूर्वी हलका मॉइश्चरायझर लावावा. वाफ घेतल्यानंतर लावलेले सीरम किंवा क्रीम त्वचेच्या खोल थरांपर्यंत शोषले जाते, त्यामुळे त्याचा परिणाम अधिक प्रभावी दिसतो.
एकूणच, योग्य पद्धतीने आणि योग्य घटकांसह फेस स्टीम घेतल्यास त्वचा मऊ, स्वच्छ, तजेलदार आणि निरोगी दिसू शकते.
