महाविकास आघाडीचा विधानसभा पराभवानंतर पक्षांतराचा भडका; फडणवीसांची भेट घेतल्यानं चर्चांना उधाण
महाराष्ट्राच्या राजकीय पटलावर लोकसभा निवडणुकीत महाविकास आघाडीने जबरदस्त कमबॅक केलं होतं, जिथे महायुतीच्या दिग्गज नेत्यांना मोठा धक्का बसला. पण विधानसभा लढतीत परिस्थिती उलटली आणि महायुतीने कमाल मुसंडी मारली. महाविकास आघाडीला आपलं लोकसभेतील वैभव टिकवता आलं नाही, उलट त्यांचा खराब पराभव झाला. काँग्रेस, शरद पवार (Sharad Pawar) गटाचा राष्ट्रवादी आणि ठाकरे गटाची शिवसेना अशा घटक पक्षांना केवळ ५० जागांवरच थांबावं लागलं. दुसरीकडे महायुतीला एकूण २३२ जागा मिळाल्या, तर भाजप हा राज्यातील सर्वांत मोठा पक्ष म्हणून उदयास आला.निवडणूक निकालानंतर महाविकास आघाडीतून महायुतीकडे नेत्यांचा प्रचंड ओघ सुरू झाला. विशेषतः शिवसेना ठाकरे गटातून भाजप आणि शिंदे गटाकडे सर्वाधिक हलचाली झाल्या. काँग्रेस आणि राष्ट्रवादी शरद पवार गटालाही याचा तडाखा बसला.
आता मात्र काँग्रेससाठी आणखी एक वाईट बातमी समोर येतेय. पक्षाचे माजी आमदार दिलीप माने (Dilip Mane) हे भाजपच्या दिशेने वळले असल्याचं बोललं जातंय. त्यांनी मुख्यमंत्री देवेंद्र फडणवीसांची भेट घेतली असून, पुढील निवडणुकांबाबत चर्चा झाली, असं माने यांनी सांगितलं.माने म्हणाले, “परवा आम्हाला हा निरोप आला की मुख्यमंत्री साहेब तुम्हाला सायंकाळी सात-साडेसात वाजता वेळ देतायत. आम्ही सर्वांनी भेट घेतली आणि पुढच्या निवडणुकांवर बोलणं केलं.” जर माने भाजपमध्ये सामील झाल्यास, येणाऱ्या महापालिका निवडणुकीआधी काँग्रेसला हा जबरदस्त धक्का ठरेल. राज्यात स्थानिक स्वराज्य संस्थांच्या निवडणुका जवळ येत असताना पक्षांतरांचा वेग वाढलाय. फडणवीस भेटीनं आता माने यांच्या राजकीय भविष्यावर प्रश्नचिन्ह निर्माण केलं असून, काँग्रेसमध्ये खळबळ उडालीये.
