सलमान आणि इमरान हश्मीच्या चर्चांना पूर्णविराम; अक्षय खन्नाच्या ‘रेहमान डकैत’ची पुन्हा एन्ट्री!
‘धुरंधर २’ सिनेमाचा ट्रेलर प्रदर्शित झाल्यापासून त्यातील दमदार डायलॉग्सनी सोशल मीडियावर धुमाकूळ घातला आहे. “जिथे दर्द आहे, तिथे मर्द आहे” आणि “पाकिस्तानचे भविष्य आता हिंदुस्तान ठरवणार” अशा संवादांमुळे चाहत्यांची उत्सुकता शिगेला पोहोचली आहे. या चित्रपटात सर्वांच्या मनात एकच प्रश्न आहे की, पडद्यामागे राहून सूत्रे हलवणारा ‘बडे साहब’ नक्की आहे तरी कोण? आधी या भूमिकेसाठी सलमान खान किंवा इमरान हश्मीच्या नावाची जोरदार चर्चा होती, मात्र ताज्या रिपोर्ट्सनुसार हे दोन्ही स्टार्स या भूमिकेत दिसणार नाहीत. त्यामुळे ‘बडे साहब’चा चेहरा अद्यापही गुपितच ठेवण्यात आला आहे.
या सिनेमात रणवीर सिंग मुख्य भूमिकेत असून सारा अली खान, आर. माधवन, अर्जुन रामपाल आणि संजय दत्त यांसारखी तगडी स्टारकास्ट पाहायला मिळणार आहे. विशेष म्हणजे, दिग्दर्शक आदित्य धर यांची पत्नी यामी गौतम या सिनेमात एका खास भूमिकेत (कॅमिओ) दिसणार आहे. तसेच, पहिल्या भागात मृत्यू झालेला ‘रेहमान डकैत’ (अक्षय खन्ना) पुन्हा एकदा पडद्यावर दिसणार असून, या भागात त्याच्या भूतकाळातील अनेक रहस्ये उलगडली जाण्याची शक्यता आहे. ट्रेलरमध्ये अक्षय खन्नाची दिसलेली एक झलक चाहत्यांसाठी मोठे सरप्राईज ठरली आहे.
चित्रपटाचे निर्माते अजून एका मोठ्या बॉलिवूड स्टारचा सरप्राईज कॅमिओ प्लॅन करत असल्याचे वृत्त आहे, ज्यामुळे प्रेक्षकांसाठी हा सिनेमा मोठा धमाका ठरेल. प्रदर्शनाची तारीख जवळ येत असताना, बॉक्स ऑफिसवर हा सिनेमा नवे विक्रम रचणार का, याकडे सर्वांचे लक्ष लागले आहे.
