सिल्लोड प्रतिनिधी : विवेक रमेश चौधरी
सिल्लोड पंचायत समिती अंतर्गत राबविण्यात येणाऱ्या ग्रामीण विकास कामांचा आढावा घेण्यासाठी महत्त्वपूर्ण बैठक पार पडली. या बैठकीला अविनाश पाटील गलांडे यांच्या प्रमुख उपस्थितीत उत्साही वातावरणात आयोजन करण्यात आले.
यावेळी जिल्हा परिषद उपाध्यक्ष जितेंद्र बाबा जैस्वाल, मुख्य कार्यकारी अधिकारी पी. एम. मिन्नू तसेच सभापती अनिताताई मोठे यांचीही उपस्थिती होती. याशिवाय पंचायत समितीचे पदाधिकारी, सदस्य आणि विविध विभागांचे अधिकारी मोठ्या संख्येने सहभागी झाले होते.
बैठकीदरम्यान विविध विकास योजनांची सविस्तर समीक्षा करण्यात आली. विशेषतः पाणीपुरवठा, रस्ते विकास, शिक्षण आणि आरोग्य सेवा, तसेच स्वच्छता मोहिमेच्या अंमलबजावणीवर भर देण्यात आला. ग्रामविकासाशी संबंधित उपक्रम अधिक प्रभावी करण्यासाठी विविध मुद्द्यांवर चर्चा झाली.
ग्रामीण भागातील नागरिकांच्या मूलभूत गरजा वेळेत आणि गुणवत्तापूर्ण पद्धतीने पूर्ण करण्यासाठी सर्व विभागांनी एकत्रितपणे काम करण्याच्या सूचना देण्यात आल्या.
अविनाश पाटील गलांडे यांनी विकास कामांच्या प्रगतीबाबत समाधान व्यक्त करत, पुढील काळात योजनांची अंमलबजावणी अधिक वेगाने आणि दर्जेदार व्हावी, असे आवाहन अधिकाऱ्यांना केले. या बैठकीमुळे सिल्लोड तालुक्यातील विकास प्रक्रियेला अधिक चालना मिळेल, असा विश्वास व्यक्त करण्यात आला.
