पायलटची चूक की तांत्रिक गोंधळ? ‘भोंदू खरात’ प्रकरणावरही भुजबळांनी डागली तोफ
राष्ट्रवादीचे ज्येष्ठ नेते आणि राज्याचे अन्न व नागरी पुरवठा मंत्री छगन भुजबळ एका मोठ्या विमान अपघातातून थोडक्यात बचावले आहेत. मुंबईहून पुण्यातील एका कार्यक्रमासाठी निघालेले भुजबळ यांचे हेलिकॉप्टर पुण्यात उतरत असताना हा थरारक प्रकार घडला. वैमानिकाने हेलिकॉप्टर निश्चित केलेल्या हेलिपॅडवर उतरवण्याऐवजी चक्क वाहनांच्या पार्किंग क्षेत्रात उतरवले. सुदैवाने, खाली असलेल्या गाड्यांना किंवा हेलिकॉप्टरला कोणतीही इजा झाली नाही आणि छगन भुजबळ यांच्यासह सर्व प्रवासी सुरक्षित बाहेर पडले. या घटनेवर प्रतिक्रिया देताना भुजबळ यांनी स्पष्ट केले की, “हा मोठा अपघात नव्हता, तर केवळ हेलिपॅड न दिसल्यामुळे पायलटने पार्किंगमध्ये लँडिंग केले, आम्ही सर्व सुखरूप आहोत.”
यावेळी माध्यमांशी संवाद साधताना भुजबळ यांनी नाशिकच्या गाजत असलेल्या भोंदू बाबा अशोक खरात प्रकरणावर कडक शब्दांत ताशेरे ओढले. “लोकांनी अंधश्रद्धेपासून दूर राहावे, तरच असे बाबा निर्माण होणार नाहीत,” असे आवाहन करत त्यांनी खरातच्या दुष्कृत्यांमध्ये सामील असलेल्यांना कडक इशारा दिला. या प्रकरणावर गेल्या सहा महिन्यांपासून मुख्यमंत्री स्वतः लक्ष ठेवून असून आता दोषींवर कारवाईची प्रक्रिया सुरू झाली असल्याचेही त्यांनी सांगितले. “अशा लोकांमुळे नाशिक जिल्ह्याची प्रतिमा मलिन होत आहे,” अशी खंतही त्यांनी व्यक्त केली.
पुण्यातील या दौऱ्यात भुजबळांनी इतर राजकीय आणि सामाजिक विषयांवरही आपली मते मांडली. राज्य महिला आयोगाच्या रिक्त असलेल्या अध्यक्षपदावर बोलताना ते म्हणाले की, “जी महिला या पदाला खऱ्या अर्थाने न्याय देऊ शकेल, तिलाच ही जबाबदारी देण्यात यावी.” तसेच नाशिकमधील वृक्षतोडीच्या वाढत्या वादावर त्यांनी आपली भूमिका स्पष्ट केली. “पर्यायी झाडे लावल्याशिवाय किंवा दुसरा मार्ग शोधल्याशिवाय वृक्षतोड करणे चुकीचे आहे, झाडे न तोडता विकासकामे व्हायला हवीत,” असा मौलिक सल्ला त्यांनी प्रशासनाला दिला आहे. भुजबळांच्या या सुरक्षित सुटकेने त्यांच्या समर्थकांनी सुटकेचा निःश्वास सोडला आहे.
