शिंदे सेनेच्या साथीने भाजपची ऐतिहासिक मुसंडी; बृहन्मुंबई महापालिकेत महायुतीला स्पष्ट बहुमत
बृहन्मुंबई महापालिकेच्या निवडणूक निकालांकडे केवळ महाराष्ट्राचंच नव्हे, तर संपूर्ण देशाचं लक्ष लागलं होतं. अखेरच्या निकालांनी मुंबईच्या राजकारणात मोठा भूकंप घडवून आणला आहे. गेली तब्बल २५ वर्षे ठाकरे कुटुंबाच्या ताब्यात असलेली बीएमसी यावेळी हातातून गेली असून, भारतीय जनता पक्षाने शिंदे गटाच्या शिवसेनेच्या मदतीने मुंबईतील सत्तेवर निर्णायक झेंडा रोवला आहे.
या निवडणुकीत भाजपने अभूतपूर्व कामगिरी करत ८९ जागा जिंकल्या, तर शिंदे गटाच्या शिवसेनेने २९ जागांवर विजय मिळवला. त्यामुळे महायुतीकडे स्पष्ट बहुमत आले असून, मुंबईत पहिल्यांदाच भाजपचा महापौर विराजमान होणार हे आता जवळपास निश्चित मानले जात आहे.
दुसरीकडे, उद्धव ठाकरे यांच्या शिवसेनेला ६५ जागांवर समाधान मानावे लागले आहे. एकेकाळी अभेद्य मानला जाणारा शिवसेनेचा बालेकिल्ला यावेळी मोठ्या प्रमाणात ढासळल्याचं चित्र आहे. काँग्रेसला २४ जागा, मनसेला ६ जागा, एमआयएमला ८ जागा मिळाल्या, तर राष्ट्रवादी काँग्रेसचे दोन्ही गट मिळून केवळ ४ जागांवरच विजय मिळवू शकले.
प्रभागनिहाय निकाल पाहता, अनेक ठिकाणी भाजप उमेदवारांनी मोठ्या मताधिक्याने विजय मिळवला आहे. काही प्रभागांमध्ये तर मताधिक्य २० हजारांच्या पुढे गेले असून, भाजपची संघटनात्मक ताकद आणि आक्रमक प्रचार याचा थेट फायदा झाल्याचं स्पष्ट होतं.
या निकालांमुळे मुंबईच्या राजकारणाची दिशा बदलली असून, येत्या काळात बीएमसीच्या कारभारात मोठे बदल पाहायला मिळणार असल्याची चर्चा राजकीय वर्तुळात सुरू झाली आहे.
