नाशिकच्या उद्योजक कैलास अहिरेंची फसवणूक; भाजप नेत्याच्या नातूसह ८ जणांवर सातपूर पोलिसांची कारवाई
नाशिकच्या सातपूर एमआयडीसीतील उद्योजक कैलास अहिरे यांची तब्बल १० कोटी रुपयांची थट्टा झाल्याचा धक्कादायक प्रकार समोर आला आहे. माजी केंद्रीय मंत्री व ज्येष्ठ भाजप नेते रावसाहेब दानवे (Raosaheb Danve) यांचा नातू शिवम पाटील (Shivam Patil) यांच्यासह एकूण आठ जणांवर फसवणुकीचा गुन्हा दाखल झाला आहे. हे प्रकरण कंपनीतील शेअर भागीदारी आणि आर्थिक व्यवहारातील कपटाचा आहे. सातपूर पोलीस स्टेशनात तक्रार दाखल झाल्यानंतर पोलिसांनी तपासाला वेग दिला आहे.कैलास अहिरे हे भाजप उद्योग आघाडीचे प्रदेश उपाध्यक्ष असून त्यांची ‘एन. व्ही. ऑटो स्पेअर्स प्रा. लि.’ ही कंपनी सातपूरमध्ये आहे. कंपनीवर कर्जाचा बोजा वाढल्याने पैशांची गरज भासत होती. याच वेळी एका कार्यक्रमात रावसाहेब दानवे यांची भेट झाली. अहिरे यांनी आपली अडचण सांगितली.
दानवे नाशिकला येऊन प्रकल्प पाहणी करून गेले आणि कर्ज फेडण्यासाठी सेटलमेंट करून देण्याचे आश्वासन दिले. बदल्यात कंपनीत १४ टक्के शेअर देण्याची अट घातली गेली. त्यानुसार २५ कोटी रुपयांचे शेअर गिरीश पवार यांना देण्याचा करार ठरला.करारानंतर दानवे पुन्हा नाशिकला आले आणि अहिरे यांना सुरुवातीला १४ कोटी ३४ लाख ९८ हजार रुपये दिले. मात्र उरलेले १० कोटी देण्यात टाळाटाळ झाली. वारंवार संपर्क करूनही उत्तर मिळेना. शिवाय, कंपनीचे शेअर परस्पर दुसऱ्या व्यक्तीच्या नावे वळते केल्याचे उघड झाले. शेअर व्यवहारातून मोठा घोटाळा झाल्याचे लक्षात येताच अहिरे यांनी पोलिसांत धाव घेतली.या प्रकरणात शिवम मुकेश पाटील (दानवे यांचा नातू), गिरीश पवार, सतीश अग्रवाल, संजय कतीरा, सुभाष कतीरा, कौस्तुभ लटके, धीरेंद्र प्रसाद आणि मंदार टाकळकर अशी आठ जणांची नावे गुन्ह्यात आहेत. डमी खात्यांमधून पैसे हस्तांतरित करणे आणि फिर्यादीला दिशाभूल करणे असे गंभीर आरोप आहेत. उद्योग क्षेत्रात या घटनेची मोठी चर्चा सुरू असून पोलिस तपासात आणखी काही धागेदोरे मिळण्याची शक्यता वर्तवली जात आहे.
