रोहित पवारांनी काँग्रेसची माफी मागितल्यानंतर बारामतीचा पेच सुटणार की लढत होणार? सुप्रिया सुळेंच्या विधानाने राजकीय वर्तुळात चर्चांना उधाण
बारामती विधानसभा पोटनिवडणुकीच्या रणधुमाळीत आता राष्ट्रवादी काँग्रेसच्या खासदार सुप्रिया सुळे यांच्या विधानाने नवी खळबळ उडवून दिली आहे. अजित पवार यांच्या निधनानंतर रिक्त झालेल्या या जागेवर त्यांची पत्नी आणि विद्यमान उपमुख्यमंत्री सुनेत्रा पवार महायुतीच्या उमेदवार आहेत. ही निवडणूक बिनविरोध करण्यासाठी प्रयत्न सुरू असतानाच सुप्रिया सुळे यांनी स्पष्ट केले की, आमदार रोहित पवार यांनी काँग्रेस नेत्यांची भेट घेऊन जुन्या वक्तव्यांबद्दल दिलगिरी व्यक्त केली आहे. मात्र, काँग्रेस आपला उमेदवार मागे घेणार का, याचे सर्व अधिकार सुळे यांनी काँग्रेसच्याच कोर्टात ठेवले आहेत. विशेष म्हणजे, ज्या दिवशी सुनेत्रा पवारांनी उमेदवारी अर्ज भरला, त्यावेळेस पवार कुटुंबातून केवळ पार्थ आणि जय पवार उपस्थित होते, ज्यावरून कौटुंबिक अंतर स्पष्टपणे दिसून आले होते.
सर्वात जास्त चर्चा रंगली आहे ती सुप्रिया सुळे यांच्या प्रचारातील सहभागाबाबत. “सुनेत्रा वहिनींच्या प्रचारासाठी तुम्ही मैदानात उतरणार का?” या प्रश्नावर सुळे यांनी “अजून काहीच ठरले नाही” असे म्हणत सावध पवित्रा घेतला आहे. सुनेत्रा पवारांनी गुपचूप घेतलेली उपमुख्यमंत्रिपदाची शपथ आणि त्यानंतर उद्भवलेली परिस्थिती यावर शरद पवारांना अंधारात ठेवण्यात आल्याचेही समोर आले आहे. पार्थ पवारांच्या भूमिकेवर बोलताना ‘आत्या’ म्हणून त्यांनी घरात सल्ला देण्याचे संकेत दिले असले, तरी राजकीय मैदानात सुप्रिया सुळे नेमकी कोणाची पाठराखण करणार, यावरून बारामतीमध्ये सध्या संभ्रमाचे वातावरण आहे. काँग्रेसची ‘वेट अँड वॉच’ भूमिका आणि सुळेंचे मौन यामुळे बारामतीची ही निवडणूक केवळ राजकीय न राहता कौटुंबिक संघर्षाचे नवे केंद्र बनली आहे.
