2,220 कोटींच्या कथित बँक फसवणुकीचा आरोप.
उद्योगपती Anil Ambani यांच्या अडचणीत आणखी भर पडली आहे. CBI ने त्यांची कंपनी रिलायन्स कम्युनिकेशन (RCom) विरोधात सुमारे ₹2,220 कोटींच्या शासकीय बँक व्यवहारांतील कथित फसवणुकीप्रकरणी नवा गुन्हा नोंदवला आहे. त्याच दिवशी ED कडून त्यांची दीर्घ चौकशीही करण्यात आली.
याआधीच ईडीने मनी लॉन्ड्रिंग प्रकरणात मोठी कारवाई करत मुंबईतील पाली हिल परिसरातील ‘अॅबोड’ ही त्यांची आलिशान इमारत तात्पुरती जप्त केली. सुमारे 66 मीटर उंच आणि 17 मजली असलेली ही मालमत्ता अंदाजे ₹3,716.83 कोटींच्या आसपास किंमतीची असल्याचे अधिकाऱ्यांचे म्हणणे आहे. ही कारवाई मनी लॉन्ड्रिंग प्रतिबंधक कायद्यांतर्गत करण्यात आली असून, संबंधित आदेश अलीकडेच जारी झाल्याची माहिती आहे.
ईडीच्या तपासानुसार, RComशी संबंधित कथित बँक फसवणूक प्रकरणात आतापर्यंत अंबानी समूहाशी निगडित एकूण जप्तीची रक्कम ₹15,000 कोटींहून अधिक झाली आहे. दरम्यान, या महिन्याच्या सुरुवातीला सुप्रीम कोर्टाने ईडीला रिलायन्स कम्युनिकेशन्स, त्यांच्या मूळ कंपन्या आणि अनिल अंबानी यांच्याविरोधातील मोठ्या प्रमाणावरील बँक फसवणुकीच्या आरोपांची चौकशी करण्यासाठी विशेष तपास पथक (SIT) स्थापन करण्याचे निर्देश दिले होते. सीबीआयच्या नव्या गुन्हा नोंदणीमुळे आणि ईडीच्या कारवाईमुळे अनिल अंबानी यांच्यावरील कायदेशीर दबाव आणखी वाढण्याची शक्यता व्यक्त केली जात आहे.
