टी-20 वर्ल्ड कपआधी शांततेचा मार्ग स्वीकारा; प्रशिक्षकपदावर मोठी जबाबदारी असल्याची आठवण
टीम इंडियाचा मुख्य प्रशिक्षक गौतम गंभीर (Gautam Gambhir) हा सोशल मीडियावर कायमच चर्चेत असतो. थेट बोलणं, स्पष्ट भूमिका आणि टीकाकारांना रोखठोक उत्तर देणं हा त्याचा स्वभाव आहे. मैदानात जसा आक्रमक होता, तसाच तो मैदानाबाहेरही आहे. मात्र हाच स्वभाव अनेकदा त्याच्यासाठी अडचणीचा ठरत असल्याचंही दिसून आलं आहे.
अलीकडेच गौतम गंभीरने काँग्रेस नेते शशि थरूर यांच्यासोबतचा फोटो शेअर करत एक भावनिक आणि लांबलचक संदेश लिहिला होता. त्यानंतर पुन्हा एकदा तो सोशल मीडियावरील चर्चेचा विषय ठरला. अशा पार्श्वभूमीवर माजी भारतीय कर्णधार अजिंक्य रहाणे यांनी गंभीरला महत्त्वाचा सल्ला दिला आहे—तोही टी-20 वर्ल्ड कप 2026 संपेपर्यंत.
क्रिकबझशी संवाद साधताना रहाणे म्हणाला, “माझा वैयक्तिक सल्ला असा आहे की गौतम गंभीरने सोशल मीडियापासून थोडं अंतर ठेवावं. लोक काय बोलत आहेत याचा विचार करण्यात वेळ घालवू नये. त्यांनी संपूर्ण कारकिर्दीत दर्जेदार क्रिकेट खेळलं आहे. आता ते भारताचे मुख्य प्रशिक्षक आहेत आणि ही जबाबदारी खूप मोठी आहे. मी स्वतःही खेळताना हेच केलं सोशल मीडियापासून लांब राहून फक्त खेळावर लक्ष केंद्रित केलं.”
टी-20 वर्ल्ड कप 2026 स्पर्धेला 7 फेब्रुवारीपासून सुरुवात होणार असून भारताचा पहिला सामना अमेरिकेविरुद्ध होणार आहे. या पार्श्वभूमीवर संघाचं पूर्ण लक्ष स्पर्धेवर असणं गरजेचं असल्याचं रहाणेने अधोरेखित केलं.
दरम्यान, मुख्य प्रशिक्षक म्हणून गौतम गंभीर सतत टीकेच्या केंद्रस्थानी असतो. एखादी वनडे किंवा कसोटी मालिका हातातून गेली, की टीकेचा भडिमार होतो. नुकतीच न्यूझीलंडविरुद्धची वनडे मालिका गमावल्यानंतर गंभीरवर वैयक्तिक पातळीवर टीका करण्यात आली होती. त्यानंतर गंभीरने सोशल मीडियावरून प्रतिक्रिया दिली होती.
मात्र टी-20 क्रिकेटमध्ये गंभीरच्या नेतृत्वाखाली टीम इंडिया चांगली कामगिरी करताना दिसत आहे. न्यूझीलंडविरुद्धची टी-20 मालिका भारताने जिंकली असून, आता टी-20 वर्ल्ड कपमध्येही अशाच कामगिरीची अपेक्षा आहे.
विशेष म्हणजे, भारताने ही स्पर्धा जिंकली तर गौतम गंभीर दोन आयसीसी ट्रॉफी जिंकणारा पहिला भारतीय मुख्य प्रशिक्षक ठरेल. त्यामुळे टीकांकडे दुर्लक्ष करत पूर्ण लक्ष वर्ल्ड कप मोहिमेवर केंद्रित ठेवणं, हाच सध्या टीम इंडियासाठी आणि गंभीरसाठी योग्य मार्ग ठरणार आहे.
