‘हिरवा रंग’ वाद पेटला; AIMIM नगरसेविका सहर शेख पुन्हा चर्चेत
एआयएमआयएम पक्षाच्या तरुण नगरसेविका सहर शेख (Saher Shaikh) यांच्या एका वक्तव्यामुळे देशभरात राजकीय वातावरण तापले आहे. निवडणूक जिंकल्यानंतर केलेल्या भाषणात “संपूर्ण मुंब्रा हिरव्या रंगात रंगणार” असे वक्तव्य केल्यानंतर त्या प्रचंड वादाच्या भोवऱ्यात सापडल्या.
या वक्तव्याचा व्हिडीओ सोशल मीडियावर झपाट्याने व्हायरल झाला असून, त्यावरून राजकीय वर्तुळात तीव्र प्रतिक्रिया उमटल्या. भाजप, विश्व हिंदू परिषदेसह विविध संघटनांनी या विधानाचा तीव्र निषेध केला. विरोधी पक्षातील अनेक नेत्यांनीही असदुद्दीन ओवैसी यांच्या पक्षावर निशाणा साधला.
वाद शांत होण्याआधीच सहर शेख यांनी इन्स्टाग्रामवर स्वतःचे काही फोटो पोस्ट केले. या फोटोंसोबत त्यांनी, “कलर… कलर… कोणता रंग?” असे कॅप्शन लिहिले. त्यासोबतच, “कंफ्यूजन ही कंफ्यूजन है, सॉल्यूशन का कुछ पता नहीं,” अशी ओळ जोडल्याने नव्या चर्चेला तोंड फुटले. ही पोस्ट सध्या सोशल मीडियावर मोठ्या प्रमाणावर व्हायरल होत आहे.
दरम्यान, भाजप नेते किरीट सोमय्या यांनी सहर शेख यांच्या विरोधात अधिकृत तक्रार दाखल केली. तक्रारीनंतर पोलिसांनी त्यांना नोटीस बजावली. यानंतर सहर शेख यांनी आपल्या वक्तव्याबाबत स्पष्टीकरण देत जाहीर माफी मागितली.
“माझं वक्तव्य केवळ पक्षाच्या झेंड्याच्या रंगाबाबत होतं. कोणाच्याही भावना दुखावण्याचा माझा हेतू नव्हता. आम्ही तिरंग्यासाठी जगतो आणि तिरंग्यासाठीच मरतो,” असे त्यांनी माफीनाम्यात नमूद केले. किरीट सोमय्या यांनी याबाबत सोशल मीडियावर माहिती देत, मुंब्रातील AIMIM नेत्या सहर शेख यांनी त्यांच्या विधानाबद्दल माफी मागितल्याचे स्पष्ट केले.
या प्रकरणावरून उद्धव ठाकरे गटाचे नेते आनंद दुबे यांनीही तीव्र प्रतिक्रिया व्यक्त केली. त्यांनी वारिस पठाण आणि इम्तियाज जलील यांच्यावर निशाणा साधत, “अशा विचारांचा आम्ही कधीही स्वीकार करणार नाही,” असे स्पष्ट शब्दांत सांगितले.
एकूणच, सहर शेख यांच्या एका वक्तव्यापासून सुरू झालेला वाद आता सोशल मीडिया पोस्ट, माफी आणि राजकीय आरोप-प्रत्यारोपांमुळे आणखी चिघळताना दिसत आहे.
