ओतूर,Otur प्रतिनिधी:दि.१८ मार्च ( रमेश तांबे )
पुणे जिल्ह्यातील मंचर येथील एक डॉक्टरचे अपहरण करून त्यांना जीवे ठार मारण्याचा प्रयत्न करत खंडणी मागितल्या प्रकरणी आर्म अँक्ट तसेच विविध कलमान्वये मंचर पोलीस ठाण्यात गुन्हा दाखल असल्याने, सदरचा गुन्हा पुणे ग्रामीणच्या स्थानिक गुन्हे शाखेच्या पथकाने उघडकीस आणून, सराईत मुख्य आरोपीला यापुर्वीच अटक करण्यात आली आहे.मात्र या गुन्ह्यातील विशेष सहभाग असलेला कुख्यात सराईत गुन्हेगार फरार आरोपी प्रविण ऊर्फ डॉलर सिताराम ओव्हाळ, वय ३२ वर्षे, रा. वाळद ता.खेड जि पुणे याला स्थानिक गुन्हे शाखेच्या पथकाने आळेफाटा एस.टी.स्टँड परिसरातून ताब्यात घेतले आहे.
सदर आरोपीच्या अंगझडतीत त्याच्या कंबरेला एक गावठी पिस्तुल व मॅग्झीनमध्ये दोन जिवंत काडतुस असा एकूण ५१ हजार रूपये किमतीचा मुद्देमाल मिळून आला असल्याची माहिती स्थानिक गुन्हे शाखेचे पोलीस निरीक्षक अविनाश शिळीमकर यांनी दिली.
Otur या बाबत अधिक माहिती देताना श्री शिळीमकर म्हणाले की,
मंचर येथील डॉक्टरचे अपहरण करून त्यांना जीवे ठार मारण्याचा प्रयत्न करत,खंडणी मागितल्या प्रकरणी आर्म अँक्ट तसेच विविध कलमान्वये दि.४ जानेवारी रोजी मंचर पोलीस ठाण्यात गुन्हा दाखल करण्यात आलेला आहे. सदर गुन्ह्यातील व्यवसायाने डॉक्टर असलेले यातील फिर्यादी कैलास रघुनाथ काळे रा.मंचर, ता.आंबेगाव, जि.पुणे हे त्यांचेकडील मोटार सायकलवरून पेठ ते मंचर असे जात अतसाना,आरोपींनी त्यांचेकडील सफारी या चारचाकी वाहनाची मोटार सायकलला धडक देऊन,डॉक्टरांना खाली पाडले व त्यांचे अपहरण करून त्यांना निघोटवाडी परिसरात नेऊन जबर मारहाण करून, २० लाख रूपये खंडणीची मागणी केली. एक लाख रूपये खंडणीची रक्कम घेवून आरोपी पैकी एकाने डॉक्टरांना जीवे मारण्याच्या उद्देशाने गावठी पिस्तुलमधून गोळी फायर केली व त्यानंतर डॉक्टरांना पुणे-नाशिक हायवे रोडचे कडेला पेठ घाटाचे जवळ सोडून दिले होते.
सदरचा गुन्हा गंभीर असल्याने पुणे जिल्हा ग्रामीण पोलीस अधीक्षक पंकज देशमुख यांच्या मार्गदर्शनाखाली स्थानिक गुन्हे शाखेच्या पथकाने सदरचा गुन्हा उघडकीस आणून, सराईत मुख्य आरोपी पवन सुधीर थोरात रा.मंचर, ता. आंबेगाव, जि.पुणे यास अटक केली होती. सदर गुन्ह्यात विशेष सहभाग असलेला कुख्यात सराईत आरोपी नामे प्रविण ऊर्फ डॉलर सिताराम ओव्हाळ हा गुन्हा घडलेपासून फरार होता. सदरचा आरोपी याचेवर खून, खूनाचा प्रयत्न, दरोडा, आर्म अँक्ट या सारखे गुन्हे दाखल असल्याने,तो पोलीस अटकेपासून स्वतःला वाचवित होता. सदरचा कुख्यात आरोपी हा आळेफाटा एस.टी. स्टैंड परिसरात येणार असल्याची माहिती स्था.गु.शा.चे पो.कॉ. अक्षय नवले यांना मिळाली होती, त्या माहितीचे आधारे दि.१५ मार्च रोजी आळेफाटा एस.टी.स्टँड परिसरातून त्याला स्थानिक गुन्हे शाखेच्या पथकाने ताब्यात घेतले आहे.
सदरची कामगिरी पुणे जिल्हा ग्रामीण पोलीस अधीक्षक पंकज देशमुख,अपर पोलीस अधीक्षक रमेश चोपडे यांच्या मार्गदर्शनाखाली स्थानिक गुन्हे शाखेचे पोलीस निरीक्षक अविनाश शिळीमकर, पोलीस अंमलदार दिपक साबळे, अक्षय नवले, संदिप वारे, राजू मोमीण, मंगेश थिगळे, विक्रम तापकीर, निलेश सुपेकर यांनी केली असून, पुढील तपास आळेफाटा पोलीस स्टेशन करत आहे
