महाराष्ट्रात गेल्या काही दिवसांपासून तापमान सातत्याने वाढत आहे. काही ठिकाणी पारा ४२ अंशांपर्यंत पोहोचला असून उष्णतेचा प्रभाव वाढत आहे. मात्र, याचदरम्यान हवामान विभागाने राज्यात येत्या १९ ते २२ मार्च दरम्यान हलक्या ते मध्यम स्वरूपाच्या पावसाचा अंदाज वर्तवला आहे. त्यामुळे पुढील काही दिवस उष्णतेच्या झळा आणि अवकाळी पावसाच्या सरी असा दुहेरी प्रभाव जाणवणार आहे.
Weather Updateराज्यात वाढत्या उष्णतेचा परिणाम
राज्यात सर्वाधिक तापमान विदर्भातील चंद्रपूर येथे ४२ अंशांच्या घरात नोंदवले गेले आहे. पश्चिम महाराष्ट्रातील कोकण भागात दमट हवामान वाढले असून उत्तर महाराष्ट्रात पहाटे काहीसा गारवा जाणवत असला तरी दुपारनंतर उन्हाचा प्रभाव प्रखर होत आहे.
उष्णतेच्या झळांमुळे बाष्पीभवनाचा वेग वाढला असून परिणामी ढग तयार होऊन काही ठिकाणी पावसाची शक्यता निर्माण झाली आहे. बंगालच्या उपसागर आणि अरबी समुद्राकडून वाहणाऱ्या बाष्पयुक्त वाऱ्यांमुळे राज्यातील हवामानात बदल होत आहे.
Weather Update राज्यात पुढील ४ दिवस पावसाचा इशारा
हवामान विभागानुसार १९ ते २२ मार्चदरम्यान महाराष्ट्रात हलक्या ते मध्यम स्वरूपाच्या पावसाची शक्यता आहे. विशेषतः कोकण, मध्य महाराष्ट्र, मराठवाडा आणि विदर्भात पावसाचा प्रभाव राहणार आहे. विदर्भात उष्णतेच्या लाटेचा यलो अलर्ट जारी करण्यात आला असून नागरिकांनी आवश्यक ती काळजी घेण्याचे आवाहन करण्यात आले आहे. तसेच मुंबई, ठाणे, पुणे, नाशिक, कोल्हापूर आणि सातारा येथे काही ठिकाणी ढगाळ वातावरण राहू शकते.
दरम्यान, हवामान विभागाच्या अंदाजानुसार, देशाच्या उत्तरेकडील भागात हिमाचल प्रदेश, जम्मू-काश्मीर, हरियाणा, राजस्थान, उत्तर प्रदेश आणि मध्य प्रदेश येथे पावसाची शक्यता आहे. हिमालयाच्या दिशेने वाहणाऱ्या वाऱ्यांमुळे या भागांत हवामान सतत बदलत आहे.
