ओतूर,प्रतिनिधी:दि.५ मार्च ( रमेश तांबे )
ओतूर वनपरिक्षेत्रामधील मौजे हिवरे तर्फे नारायणगाव ( भोरमळा ) Otur News ता. जुन्नर येथे दि.२८ फेब्रुवारी रोजी शेतात शाळू कापत असताना किसन लक्ष्मण भोर यांच्यावर बिबट्याने हल्ला केल्याने ते जखमी झाल्याने त्यांना नारायणगाव येथील खाजगी रूग्णालयात उपचारासाठी दाखल झाले होते. दरम्यान जुन्नर वनविभागाच्या वरिष्ठ अधिकाऱ्यांनी या घटनेची सखोल चौकशी केली असता,किसन भोर यांच्यावर बिबट्याने हल्ला केला नसून, ते शेतात शाळू कापताना त्यांना विळा लागला होता. मात्र भोर यांनी बिबट्याने हल्ला केला असल्याचा बनाव केल्याचे तपासात निष्पन्न झाले असल्याची माहिती जुन्नरचे उपवनसंरक्षक अमोल सातपुते यांनी दिली.
याबाबत ओतूरचे वनपरिक्षेत्र अधिकारी लहू ठोकळ हे अधिक माहिती देताना म्हणाले की,किसन भोर हे त्यांचे मालकीचे शेतातील शाळू (ज्वारी ) विळ्याने कापत असताना दि.२८ रोजी सायंकाळी ६ वाजण्याच्या सूमारास वन्यप्राणी बिबट्याने हल्ला केल्याने, ते गंभीर जखमी झाल्याने त्यांना विघ्नहर्ता हॉस्पीटल, नारायणगाव येथे पुढील उपचाराकरीता दाखल करण्यात आले, अशी माहिती वन विभागाला मिळाली होती. त्याअनुषंगाने वनपरिक्षेत्र अधिकारी, ओतूर यांनी कर्मचाऱ्यांसमवेत तात्काळ घटनास्थळी तसेच विघ्नहर्ता हॉस्पीटल येथे जाऊन भोर यांना आवश्यक ती मदत केली.
श्री किसन भोर यांना वन्यप्राणी बिबट हल्ल्याच्या अनुषंगाने आवश्यक नुकसानभरपाई देणेसाठी आवश्यक स्थळपाहणी करणेकामी दि.१ मार्च रोजी हल्ला झाल्याच्या ठिकाणी वनकर्मचाऱ्यांसह जाऊन,सदर ठिकाणची पाहणी केली असता घटनास्थळाच्या चारही बाजूंनी ऊस शेती असून सदर परिसरात पायी फिरुन पाहणी केली असता सदर ठिकाणी वन्यप्राणी बिबट्याच्या पाऊलखुणा, विष्ठा इ.अप्रत्यक्षखुणा आदी पुरावे आढळून आले नाहीत. वन्यप्राणी बिबट हा त्याचे नैसर्गिक सवयीने भक्ष्यावर पुढील पायाने हल्ला करतो, त्यावेळी त्याच्या पुढील पायाची सर्व नखे बाहेर येतात. श्री. किसन भोर यांना झालेली जखम ही त्यांच्या डाव्या पायाच्या पिंढरीवर ( गुडघ्याच्या खालील भागावर ) एकच उभा खोल ओरखडा असून तो वन्यप्राणी बिबटने केला नसल्याचे दिसून आले आहे, कारण वन्यप्राणी बिबटचा हल्ला झालेल्या ठिकाणी त्याच्या नख्यांचे दोन-तीन ओरखडे उमटतात. तसेच किसन भोर यांच्या शरीरावर इतरत्र कुठेही बिबट वन्यप्राण्याने चावा घेतल्याच्या खुणा देखील दिसून आल्या नाहीत. वरील सर्व बाबी विचारात घेतले असता त्यांचेवर वन्यप्राणी बिबट्याने हल्ला केला नसल्याचे तपासाअंती स्पष्ट झाले आहे.
दरम्यान दि.२८ रोजी सायंकाळी सदर घटना ही वन्यप्राणी बिबट्याच्या हल्ल्यामध्ये श्री.भोर हे गंभीर जखमी झाल्याचा बनाव करून मौजे नारायणगाव येथील पुणे-नाशिक महामार्गावर काही स्थानिक आंदोलकांनी अर्धवट माहितीच्या आधारे सुमारे दोन तास रास्तारोको आंदोलन करुन सामान्य नागरिकांना नाहक वेठीस धरले. सदर आंदोलनामुळे स्थानिकांमध्ये अनावश्यक वन्यप्राणी बिबट बाबत भीती निर्माण करण्यात आली. तसेच सदर आंदोलनामध्ये वनविभागाची प्रतिमा मलीन करण्याचा प्रयत्न करण्यात आला. उत्तर पुणे जिल्ह्यातील नागरिकांनी अफवावर विश्वास न ठेवता बिबट समस्या हाताळणीत वन विभागास सहकार्य करावे, असे आवाहन जुन्नर वन विभागाकडून करण्यात येत आहे.
“जुन्नर वनविभागामध्ये मानव बिबट संघर्ष कमी करण्यासाठी वेळोवळी नावीन्यपूर्ण उपक्रम हाती घेवून मानवावरील हल्ले कमी करण्यासाठी अविरत प्रयत्न चालू आहेत. यामध्ये शीघ्र बचाव पथकाचे पाच ठिकाणी बिबट बेसकॅम्प, शेतातील घरांना सुमारे ६५० सौरकुंपणे, मेंढपाळ बांधवांसाठी ४१० तंबु व सौरदिवे पुरवठा करण्यात आले आहेत.
तसेच वन्यप्राणी बिबट्यास लोकवस्तीपासून परावृत्त करण्यासाठी सौरऊर्जा चलित एनायडर ७५ ठिकाणी, तसेच आर्टिफिशियल इंटेलिजन्स प्रणाली ५ ठिकाणी प्रायोगिक तत्वावर बसविण्यात आली आहे. आपत्ती व्यवस्थापनांतर्गत ३८८ आपदा मित्रांना मानव-बिबट संघर्षाच्या अनुषंगाने प्रशिक्षण, दृक-श्राव्य माध्यमातून व्यापक प्रमाणात जनजागृती असे अनेक प्रकल्प राज्यात पथदर्शी ठरत आहेत.
