मुंबई / रमेश औताडे
कोणतीही संघटना कार्यकर्त्यांच्या जीवावर मोठी होते. त्यांच्या सहकार्यामुळेच संघटना वाढत असते. त्यामुळे कामगार संघटनेमध्ये कामगार कार्यकर्ते फार महत्त्वाचे असतात, असे मत ज्येष्ठ कामगार नेते ॲड. एस.के. शेट्ये यांनी ब्रिटिश काळात स्थापन झालेल्या कामगार संघटनेच्या (BPT Employees Union) १०४ व्या वर्धापन दिन समारंभ प्रसंगी व्यक्त केले.
ब्रिटिश काळात ३ मे १९२० रोजी स्थापन झालेल्या बी. पी. टी. एम्प्लॉईज युनियनला (आताचे नाव-मुंबई पोर्ट ट्रस्ट डॉक अँड जनरल एम्प्लॉईज युनियन) १०४ वर्ष पूर्ण झाली असून, ३ मे २०२४ रोजी माझगाव येथील कामगार सदन सभागृहात या संघटनेचा वर्धापन दिन संपन्न झाला.
BPT Employees Union : त्रिसूत्रीचा मार्ग उपयुक्त
याप्रसंगी ज्येष्ठ कामगार नेते ॲड. एस. के. शेट्ये यांनी आपल्या अध्यक्षीय भाषणात मार्गदर्शन करताना सांगितले की, मागण्या मान्य करून घेण्यासाठी संप हे कामगारांचे शेवटचे हत्यार आहे. परंतु, हे हत्यार देखील आता बोथट झाले आहे. सध्याच्या काळात काम करताना सहकार्य, सामंजस्य व सुसंवाद हा त्रिसूत्रीचा मार्ग फार उपयोगी आहे.
BPT Employees Union : असंघटित कामगारांच्या एकजुटीचे आव्हान
केंद्र सरकारने कामगार कायद्यात कामगार विरोधी बदल केले असून, भविष्यात कामगार संघटनांमध्ये कार्य करणे फार कठीण जाणार आहे. केंद्र सरकारच्या धोरणामुळे कायमस्वरूपी कामगार कमी होत असून, प्रत्येक उद्योगात कंत्राटी कामगारांची संख्या वाढत चाललेली आहे. त्यामुळे असंघटितांना संघटित करणे हे खऱ्या अर्थाने कामगार चळवळीसमोर मोठे आव्हान आहे. त्या दृष्टीने कामगार कार्यकर्त्यांनी काम केले पाहिजे. शेवटी कामगारांचे कोणतेही प्रश्न सोडवायचे असतील तर कामगारांची एकजूट फार महत्त्वाची आहे. या एकजूटीवरच कामगारांच्या मागण्या मान्य होऊ शकतात, असे शेट्ये म्हणाले.
यावेळी मुंबई पोर्ट ट्रस्ट डॉक अँड जनरल एम्प्लॉईज युनियनचे जनरल सेक्रेटरी सुधाकर अपराज, कार्याध्यक्ष डॉ. यतीन पटेल, सेक्रेटरी विद्याधर राणे, सेक्रेटरी व मुंबई पोर्ट प्राधिकरणाचे बोर्ड मेंबर दत्ता खेसे, सेक्रेटरी विजय रणदिवे, उपाध्यक्ष शीला भगत, निसार युनूस, प्रसिद्धी प्रमुख मारुती विश्वासराव, संघटक चिटणीस मनीष पाटील यांनी युनियनच्या वर्धापन दिनानिमित्त कामगार कार्यकर्त्यांना मार्गदर्शन केले. युनियनचे पदाधिकारी विकास नलावडे, संदीप कदम, विष्णू पोळ, संदीप चेरफळे, प्रदीप नलावडे त्याचप्रमाणे कामगार व कार्यकर्ते उपस्थित होते.
